Krah për krah me njëri-tjetrin, në grumbullime njerëzish, pa respektuar asnjë distancë dhe masë mbrojtëse për të dalë me masë e doreza, qytetarët durrsakë e kanë nisur ditën vonë. Janë zgjuar rreth orës 09:00 kur janë parë edhe lëvizjet nëpër rrugë, dhe janë përqendruar nëpër dyqane për të blerë fruta e perime dhe ushqime. Dyqanet hapen rreth orës 06:30, ku qytetarët kanë kohë deri në orën 10:00 të paradites për të bërë blerjet. Por edhe pse duket se deri më tani orarin e paradites po e zbatojnë, duke u futur në shtëpi pas orës 10:00 kur edhe nuk lejohet më qarkullimi, qytetarët nuk e kanë kuptuar ende se e rëndësishme është të ruajnë distancën dhe të dalin vetëm pa shoqërues. Shumë pranë njëri-tjetrit, të rinj e të reja në Durrës shihet se nuk kanë të vendosur maska mbrojtëse apo doreza në duar, ku duhet theksuar se kujdesi më i madh duhet treguar edhe në momentin kur bëhen pazaret.