Një fëmijë 11-vjeç është aksidentuar paraditen e sotme në Kukës. Fëmija ka qenë në lagjen Gostil në aksin rrugor Bicaj-Kukës në momentin që është përplasur nga një makinë tip "Mitsubish" e një kompanie celulare. Report Tv sjell pamjet nga vendi i ngjarjes.
Ndihma e parë fëmijës i është dhënë në spitalin e Kukësit, por duke qenë se gjendja paraqitej e rëndë, 11-vjeçari me inicialet E.M. u transportua drejt spitalit të Traumës në Tiranë për mjekim më të specializuar.
Shoferi që shkaktoi aksidentin është A.H. 35 vjeç, banues në Bushtricë. Fillimisht në informacion e parë, policia njoftoi se drejtuesi braktisi makinën pas aksidentit duke u arratisur nga vendi i ngjarjes.
Por disa minuta më pas, drejtoria e policisë Kukës njofton se 35-vjeçari që shkaktoi aksidentin u largua nga vendi i ngjarjes pasi dërgoi në spitalin e Kukësit me një tjetër makinë fëmijën që aksidentoi dhe më pas u dorëzua. Grupi hetimor po punon për zbardhjen e rrethanave të aksidentit.