Halim Kosova: Tritan Shehu ndërhyri për një tender korruptiv 500 mijë dollarë për një ilaç për fëmijët me leucemi, më tha 'mbyll sytë, është njeriu jonë'

3 Mars 2021, 09:55 | Përditesimi i fundit: 2021-03-03 13:43:02

TIRANË- Mjeku Halim Kosova ka hedhur akuza të forta në drejtim të Tritan Shehut pasi akuzon se kur ai vetë drejtonte Ministrinë e Shëndetësisë në kohën e PD-së, Shehu ndërhyri te ai për një tender korruptiv me vlerë 500 mijë dollarë ilaçe për fëmijët me leucemi.

Sipas Halim Kosovës, i cili ka drejtuar Ministrinë e Shëndetësisë në fund të mandatit të dytë të Qeverisë Berisha në vitin 2013, nëse ilaçi blihej pa tender kushtonte 100 mijë dollarë. Ndërsa me tender vlera shkonte rreth 70 mijë dollarë. Ndërkohë, njeriu i Tritan Shehut i kishte kopsitur letrat për një vlerë rreth 660 mijë dollarë.

Kjo, ka sqaruar Kosova, i shpjegon të gjitha sulmet që Shehu ka bërë në drejtim të tij.

“Ça ka Tritani me mua? Kur kam qenë ministër është po ky që ka ndërhyrë që unë të mbyll sytë për një aferë  korruptive, për një ilaç për leuceminë për fëmijët në spitalin e pediatrisë nga 100 mijë dollarë që shkonte pa tender, se me tender shkonte 70 mijë ishin bërë gati letrat për 665 mijë, pra 565 mijë më shumë se sa çmimi pa tender. Të lutem shumë më tha, ky është i joni, ky punon për ne. Ma zgjidh një çikë hallin. I kam me mesazhe. Edhe më erdhi personi në zyrë, më tha jo kështu po ashtu, dhe në fund me tha të jap kaq para. I thashë vetëm një gjë: mos më vidh në sistemin shëndetësor sa të jem unë këtu se do të gjesh belanë. Dhe kuptohet që Tanit i mbeti hatri dhe me tha që 'unë ta solla për të mbaruar punë dhe ti ma trembe”, ka deklaruar mjeku Kosova.