TIRANE - Shkon në nëntë numri i të dyshuarve si pjesë e grupit kriminal në hetim nga Krimet e Rënda për vrasjen e ish-policit Santiago Malko.
Pas të dyshuarve shpallur në kërkim, Krimet e Rënda kanë riformuluar akuzën për Bledar Tetën, të vetmin të arrestuar nga moskallëzim krimi, në vrasje e kryer me paramendim në bashkëpunim.
Ky vendim është marrë nga prokurori Behar Dibra, i cili i ka komunikuar të ndalurit akuzën ndërsa i ka kërkuar Gjykatës së Krimeve të caktojë arrest me burg.
Leonard dhe Elis Duka, Xhoni Nica, Oltian Loka, Ilir Selmani, Aleksandër Maxhaku, Dritan Agaj, Fatmir Hyseni janë personat e dyshuar si të përfshirë në këtë krim ndërsa prej ditësh janë shpallur në kërkim.
Ekzekutimi i Malkos ndodhi më 27 gusht 2019 në rrugën "Xhanfize Keko" në Tiranë dhe nga ajo ditë i vetmi i ndaluar është Teta i cili u zbulua prej automjetit që përdorte dhe kamerat e sigurisë e fiksuan afër vendit ku i vra Santiago Malko, 26 vjeç.
ReportTv ka mësuar se Xhoni Nica, një nga personat e shpallur në kërkim, me anë të avokatit të tij, Alban Qafa, pretendon se kur ka ndodhur vrasja ai ka qenë jashtë vendit.
Provat, si pasaporta dhe biletat, avokati i tij i ka depozituar në prokurorinë e Krimeve të Rënda aty ku do të vlerësohen nëse janë apo jo të vërteta.