Nga janari në tetor në vend kanë hyrë 3.5 milionë turistë të huaj më pak krahasuar me vitet e kaluara. Ndërkohë operatorët turistik thonë se humbja është më e madhe dhe qytetarët kanë frikë të rezervojnë jashtë vendit për Krishtlindje.
Sipas të dhënave më të fundit të INSTAT, rënia është në nivelin e 60.2% krahasuar me 2019-ën, por operatorët turistik thonë se shifra është më e lartë.
Shifrat janë alarmante, ato realet ndoshta janë edhe më alarmante nga këto që publikohen. Hyrje dalje nuk është patjetër për qëllim turistik ka edhe arsye të tjera pavarësisht se si deklarohet nga individi. Shkojmë përtej 70% në humbje si për numrin e turistëve dhe për anën financiare”, shprehet operatori turistik Ferjolt Ozuni.
Por a ka shpresë për rezervime dhe udhëtime për festat e fundvitit?
“Sa për krishtlindjet dhe për vitin e ri njerëzit janë të dyzuar sepse nuk e dinë se çfarë do të ndodhi, do mbyllemi apo jo. Kam një mungesë optimisti ndoshta të theksuar për atë periudhë dhe njerëzit do të detyrohen të rrinë në shtëpi”, pohon ai.
Ndërsa për festat e nëntorit, edhe pse të pakta rezervimet kanë nisur.
“Njerëzit na kanë kontaktuar për të kthyer udhëtime tradicionale në Theth Valbonë, Korçë Pogradec maksimumi me një natë qëndrimi pra 2 ditore. Është tendenca që qytetarët të vetë-grumbullohen, dhe të kërkojnë mjete të vogla transporti për të qenë të sigurt dhe mos të kenë të bëjnë me njerëz të tjerë në mjet”, tha Ozuni.
2020 mund të konsiderohet vit i turizmit patriotik. Ndryshe nga shtetet e tjera përjashtim bën vetëm Kosova, me të cilën rënia është e lehtë, madje në tetor ne kishim rritje të turistëve që janë futur në vend.
“Ne jemi e vetmja alternativë për Kosovën në rajon dhe është shfrytëzuar, për shkak të situatës. Është i vetmi shtet që ka qenë në rritje në 3-4 muajit e fundit krahasuar me 2019. Ashtu siç ne ishim porta dalëse për Kosovën ashtu edhe për ne Turqia ishte porta dalëse për pushime. Ka pasur nga 5 autobusë çdo javë me turistë shqiptar që kanë shkuar drejt Turqisë nga shtatori e në vazhdim”, thotë Ozuni.