LEZHE- Vijon të mbetet pa zgjidhje problemi i 9 familjeve të komunitetit rom dhe egjiptian, të cilat dy ditë më parë u larguan nga palestra e gjimnazit të Lezhës, ku qëndronin të strehuar që prej tërmetit të 26 nëntorit, pasi banesat u dëmtuan rëndë. Në mungesë të strehimit disa prej familjeve janë rikthyer në pallatin e shpallur të pabanueshëm.
Banorët janë të vetëdijshëm për rrezikun që ka ky objekt, por thonë se nuk mund të qëndronin jashtë në të ftohtë. Ata i kërkojnë bashkisë që të ndërhyrjë për të gjetur shtëpi me qira, pasi për shkak të paragjykimeve nuk i japin banesë.
Ndërkohë autoritetet lokale i qëndrojnë vendimit të akordimit të bonusit të qirasë dhe në këto kushte këto familje duhet të gjejnë vetë strehim.
I kontaktuar nga Report Tv për këtë çështje kryebashkiaku i Lezhës, Pjerin Ndreu deklaroi se këto familje po trajtohen me bonusin e qirasë dhe duhet të gjejnë vetë strehim. Ndreu shtoi se pallati ku kanë jetuar këto familje, brenda këtyre ditëve do shembet dhe menjëherë do të nisë rindërtimi, pasi bashkia e ka siguruar financimin përmes donacioneve.