Kryeministri Edi Rama nga foltorja e Kuvendit deklaroi seancën e sotme plenare se kryebashkiakja Voltana Ademi me vendimin për të mos i lejuar PS-së zhvillimin e mitingut pasditen e sotme në Shkodër mund të ketë në plan për të bërë një tjetër '2 Prill' referuar ngjarjes së 1991 kur u vranë katër persona, ngjarje që konsiderohet dhe si masakra e fundit e komunizmit në Shqipëri. "Mbase plani është për të bërë një 2 Prill tjetër sot pasdite, pasi historia ka ndryshuar, por asgjë nuk ka ndryshuar në vizion, qasje dhe metodë në kokën e atij që është lideri suprem i PD-së" tha ai.
Kryetarja e grupit Demokrat në Kuvend, Rudina Hajdari i kërkoi kryeministrit që nëse ka informacion se mund të ketë një ngjarje të tillë atëherë të tërhiqet dhe të mos zhvillojë zgjedhjet, pasi nuk na duhen më viktima. "Nëse ju këmbëngulni që zgjedhjet më 30 qershor, nëse ju keni informacion që do ketë vrasje si në 2 prill a nuk është e drejtë që t'i evitoni këto konflikte, dhe të ruani jetët e njerëzve dhe të mos dilni këtu të thoni do ruajmë shtetin e së drejtës?".
Kryeministri vijoi akuzat kundër Presidentit duke thënë se po i hedh bezinë zjarrit, të konfliktit politik. "Ai që është në zyrën e Presidentit po i hedh benzinë zjarrit". Ndërsa Rudina Hajdari e paralajmëroi kreun e shtetit se nëse ka ndërmend që të shpërndajë parlamentin duhet ti thotë burgut hapu. "Nëse mendoni se presidenti do të shpërndajë parlamentin, ti thotë burgut hapu. Nuk e ka për kompetencë".
Kreu i qeverisë i cilësoi si talebanë kryetarët e bashkive dhe militantët e PD-së që sulmuan KZAZ-të. Pas kërkesës së opozitës, ai pranoi që t'i jepte kohë opozitës së re në Kuvend për të diskutuar për nismën e PS-së që personat që do të dënohen për krime elektorale të mos lejohen të dalin nga vendi 5-10 vite pas kryerjes së dënimit. Gjatë fjalës së tij, ai u ndal edhe te përgjimet që i cilësoi sallatë fjalësh.
Ai tha se bisedat e dala nga PD-ja po i kryejnë funksionet për të penguar hapjen e negociatave, që edhe mund të shtyhen në tetori, ndërsa shtoi se si biseda që ka bërë dhe që doli para tre ditësh ka zhvilluar me mijëra me shtabet. Kryeministri theksoi se antena e përgjimeve u vendos vetëm mbi shtabin e PS-së dhe jo tjetrën, referuar grupit të Flamur Nokës që u përplas me socialistët në zgjedhjet e Dibrës.