KAMËZ- Familjet që përfitojnë ndihmë të posaçme të kujdesit social do t'u paguhen dritat dhe ujii si dhe garanci për arsimin e fëmijëve. Ky është programi ekonomik i prezantuar nga kreu i Partisë Demokratike, Lulzim Basha teksa ishte në familjen e Agim Lleshit në Kamëz, kryefamiljar, baba i 8 fëmijëve, që jetojnë në kushte shumë të vështira ekonikime.
Në kuadër të komunikimeve të tij nën moton "po të dëgjoj", kryedemokrati bëri me dije se me ardhjen e tij në pushtet jo vetëm që do të rritet ndihma sociale, por do të kenë një mbështetje të veçantë nga shtetit.
"Familjet me shumë fëmijë duhet të kenë mbështetje të veçantë nga shteti, kudo në botë e kanë. Shteti që nuk kujdeset për fëmijët është si babai i keq, që nuk do t’ia dijë për familjen. Fjala që unë po të jap në shtëpinë tënde është se nuk ka për të ngelur fëmijë shqiptari pa studiuar për shkak të gjendjes ekonomike të prindërve. Shqipëria i ka mundësitë”. Ato lekë që i marrin një grusht njerëzish, duhet t’i marrin njerëzit në nevojë. Sakrifica e madhe që po bëni si prindër të jeni të sigurt se do t’ju shpërblehet”- u shpreh kreu i opozitës.
Babai i 8 fëmijëve, në komunikimin me Bashën, tha se e ka të pamundur që me ndihmën që merr të mbajë familjen e tij, e aq më tepër t'i shkollojë. Megjithatë, Basha i premtoi se gjërat do të ndryshojnë.
“Jam invalid, i operuar për zemrën dy herë, gruaja është e papunë, se rrit fëmijët. Jetojmë me 180 mijë lekë nga invaliditeti dhe ndonjë punë që bëjnë dy çunat e mëdhenj. Por qeveria na kërkon çdo gjë, edhe dritat, edhe ujin, na shkatërruan. Nuk kam patur mundësi t’i përballoj të gjitha, se duhet të ble edhe 80 mijë lekë ilaçe. Janë mbushur listat nëpër dyqane plot dhe nuk di, vetëm të kap kokën me grushta e të shkoj të mbytem. Shteti nuk më ndihmon askund, kam rënë në pikë të hallit”, tha ai.