Partia Socialiste ka nisur përgatitjet për të thirrur aleatët e saj jo parlamentarë për të riaktivizuar Aleancën për Shqipërinë Evropiane. Dy takime janë parashikuar të zhvillohen në janar dhe shkurt, ndërsa në 15 mars është paracaktuar nënshkrimi i marrëveshjes së re të PS-së me aleatët e vegjël.
Por ndryshe nga viti 2015, ku 37 parti ju bashkuan koalicionit të drejtuar nga PS, për qershorin e këtij viti duket se koalicioni i PS do të bëhet vetëm me parti jo parlamentare.
Në 2015, aleatët e Partisë Socialiste të gjitha së bashku morën vota më shumë se sa PS e vetme. Partitë e vogla grumbulluan 590 mijë vota, kundrejt 400 mijë të tillave që PS mori në logon e saj.
Por në koalicionin e ri, PS-së do t’i mungojnë 260 mijë votat e LSI-së, 60 mijë të PDIU-së dhe rreth 20 mijë të Nard Ndokës, të rreshtuar tashmë krah Bashës. Kur nuk dihet ende pozicionimi i PBDNJ-së së Dulet apo Social Demokratëve të Gjinushit që administrohen nga Tom Doshi, torba e votave të të vegjëlve është tkurrur.
Sipas përllogaritjeve, janë rreth 250 mijë vota që të vegjlit mbledhin për këshillat bashkiakë, diçka më shumë se sa gjysma e votave që merr PS.
Socialistët synojnë të shfrytëzojë përsëri të gjitha ato parti të vogla, të cilat në disa zona të caktuara kanë peshë specifike sidomos për shumicën e këshillave bashkiakë.
Në grumbullin e madh të partive që në 2015 nënshkruan përkrah Ramës, vetëm 8 parti morën më shumë se 10 mijë vota në rang kombëtar.
Partia me peshën kryesore është Fryma e Re Demokratike e Bamir Topit me rreth 30 mijë vota, e ndjekur nga Partia Demokracia Sociale e Milos me 20 mijë vota. E treta është partia e Petro Kocit, PSV91 me 17 mijë vota, e ndjekur nga Partia Socialiste e Moderuar me 15 mijë vota. Me 12 mijë vota vijon Aleanca Arbnore Kombëtare e ndjekur nga përafërsisht 10 mijë vota Aleanca Demokratike, Partia e Gjelbër dhe Partia Unitetit Kombëtar.
Votat e partive parlamentare ASHE 2015
1. Partia Socialiste e Shqipërisë 402.709
2. Lëvizja Socialiste për Integrim 259.934
3. Partia Drejtësi,Integrim dhe Unitet 59.701
4. Partia Demokristiane e Shqipërisë 20.271
Vota të partive jo parlamentare ASHE në 2015
1. Fryma e Re Demokratike 29.984
2. Partia Demokracia Sociale 20.064
3. Partia Socialiste e Vërtetë 91 17.465
4. Partia Socialiste e Moderuar 15.355
5. Aleanca Arbnore Kombëtare 12.647
6. Aleanca Demokratike 11.392
7. Partia e Gjelbër 10.221
8. Partia Unitetit Kombëtar 10.078
Gjithsej koalicioni ASHE 991.609