TIRANË- Me gjysmën e votave të opozitës së re, Partia Socialiste ka miratuar në Komisionin e Ligjeve, draftin e ri i të mazhorancës për ndryshimet në Kodin Zgjedhor. Me votat pro të Adiola Brahës dhe Nimet Musait, të ardhur nga listat e LSI-së u miratua propozimi i ri i Gjiknurit që u prezantua po ditën e sotme.
Ky propozim parashikon një ulje të pragut për partitë nga 3 deri në 1%, ri-renditje të pjesës së parë të listës së kandidatëve bazuar tek vota preferenciale, i jep të drejtë kryetarit të partisë të garojë në 4 zona zgjedhore njëkohësisht, jo 12 siç e kërkoi Myslim Murrizi. Për t'u ngjitur në listë, kandidatëve u vendoset prag tavan 10 mijë vota.
Gjithashtu, u miratuan edhe koalicionet me listë unike, jo të përbërë siç e kërkon PD-LSI. Megjithatë ndryshe nga nenet e tjera, në këtë rast opozita parlamentare u largua nga mbledhja dhe kaloi pa votat e tyre. Teksa deputetët e tjerë u rikthyen, Rudina Hajdari, Andi Përmeti dhe Ralf Gjoni dolën hapur kundër draftit të ri të PS-së, duke e quajtur tallje me opozitën parlamentare dhe shqiptarët, për pasojë bojkotuan mbledhjen e Komisionit të Ligjeve.
Pas braktisjes së Komisionit të Ligjeve nga opozitarët e rinj, PS do duhet ta miratojë këtë draft në seancën e 5 tetorit në konsensus me opozitën parlamentare, shumica prej të cilëve kanë deklaruar publikisht se nuk do të votojnë një draft i cili nuk lejon një hapje të listave 100%.
Si bëhet renditja e listës pas ndryshimeve të miratuara sot?
Lista bëhet nga kryetari i partitë. Kandidati mund ta prishë këtë renditje të bërë nga partia, vetëm nëse merr me shume votat parapëlqyese se sa mesatarja që ka marrë partia për të fituar një mandat deputeti në një qark të caktuar. Ky ''pragu'' me amendamentet e reja të propozuara sot nga Partia Socialiste është ulur në një maksimum prej 10 mijë votash.
Shpërndarja e mandateve
Sipas formulës së PS, shpërndarja e mandatit fillon sipas renditjes së kandidatëve nga i pari tek i fundit, në bazë të listës që ka bërë kryetari i partisë. Renditja e kandidatëve ndryshon vetëm nëse kandidati ka marrë një numër votash parapëlqyese më të madhe se herësi, që del nga pjesëtimi i numrit të votave të subjektit me numrin e mandateve të fituara, por jo më shumë se 10 mijë vota.
PSH: Nëse në Korçë herësi për një deputet të PS është 11 mijë vota dhe PS ka marrë 5 deputetë, kandidati poshtë listës fituese duhet të marrë te pakten 10 mijë e një vota për tu bërë deputet dhe të ketë më shumë vota se kandidatët e listës fituese.