Partia Demokratike i ngarkon fajet qeverisë shqiptarë për radhën e krijuar në Kakavijë nga qytetarët që duan të largohen drejt Greqisë, por që duhet të kryejnë tamponin për të bërë diçka të tillë.
PD fillimisht shpreh ngushëllimet për familjarët e fëmijës që sot humbi jetën pasi u përplas nga një ambulancë, e cila po shkonte për t'i dhënë ndihmë një qytetari i cili nuk ishte ndjerë mirë për shkak të radhëve të gjatë. Më tej PD thotë se qeveria ka përgjegjësi për disa arsye dhe se nuk zgjidhen këto probleme duke bërë postime në rrjetet sociale. Reagimin e PD-së, e ka shpërndarë më pas kryedemokrati Lulzim Basha.
DEKLARATË E PARTISË DEMOKRATIKE
Mendimet dhe lutjet tona janë sot me prindërit dhe familjarët e fëmijës që humbi sot jetën në aksidentin tragjik, në mesin e krizës humanitare të krijuar prej 4 ditësh në pikën kufitare të Kakavijës. Zoti ju dhëntë forcë për ta përballuar dhimbjen dhe këtë humbje të rëndë.
Kjo ngjarje e rëndë është një tjetër alarm tragjik për braktisjen e qytetarëve nga qeveria. Është e pafalshme që qeveria lejoi krijimin e radhëve të gjata, dhe nuk informoi qytetarët në kohë.
Është në përgjegjësinë e qeverisë që Shqipëria u shndërrua në zonë të kuqe COVID, pasojë e të cilës është edhe kjo krizë humanitare në kufi.
Kjo krizë nuk zgjidhet me propagandë në rrjetet sociale. Nuk zgjidhet me postime virtuale nga rezidencat luksoze qeveritare ku pushon kryeministri, dhe as me xhiro me helikopter dhe rikthim në hotele me 5 yje ku pushojnë anëtarët e kabinetit të tij qeveritar.
Zgjidhja e krizës humanitare kërkon angazhimin në nivelet më të larta të qeverisë dhe komunikim të vazhdueshëm me qytetarët shqiptarë. Njerëzit meritojnë të trajtohen me dinjitet nga shteti i tyre."