Ka shkuar në Parlament plani që kalon përgjimet në duart e policisë, duke nxjerrë jashtë loje prokurorinë. Plani kërcënon të drejtat e njeriut në Shqipëri, pasi krijon hapësirat që policia të kthehet në një instrument nga pushteti i radhës, për të përgjuar dhe shantazhuar këdo për interesa të caktuara, pa një institucion të pavarur kontrollues. Nisma ligjore ndryshon nenin 131 të ligjit aktual për Policinë e Shteti, duke i dhënë kompetencë policisë, pa marrë leje tek prokuroria, të përgjojë bisedat e personave në ambiente publike, në mjete të transportit publik si dhe bisedat telefonike.