Kombëtarja shqiptare grumbullimin për dy ndeshjet e para kualifikuese të Europianit kundër Turqisë dhe Andorës i ka nisur me shumë zhurmë. Kjo për shkak të përjashtimit të Strakoshës si dhe deklaratave të Lenjanit se nuk vjen në Kombëtare pa u larguar Panucci. Për këto situata të krijuara mesfushori kuqezi Migjen Basha ka deklaruar:
“Lenjani ka marrë vendimin e vet. Për sa i përket Strakoshës është çështje disiplinore, ishte gabim dhe trajneri mori vendimin”
Ndërkohë Ledian Memushaj për dy ndeshjet e radhës është shprehur:
“Të gjithë lojtarët kanë minuta dhe është pozitive. Kemi shumë mungesa, por këto nuk duhen menduar. Duhet menduar ndeshja me Turqinë dhe duhet kaluar në ndeshje të vështira. Është pozitive që jemi me minuta.”
Me kombëtaren së fundmi janë bashkuar mesfushori Ylber Ramadani dhe mbrojtësi i Partizanit Lorenc trashi, ndërsa për shkaqe dëmtimi janë larguar Andi Lila dhe Egzon Binaku. Më herët klubet spanjolle të ‘Segunda Divizion’ kanë refuzuar ftesat e kombëtares për Keidi Baren dhe Rei Manajn, pasi nuk janë lajmëruar brenda harkut kohor të 14 ditëve.