TIRANË- Nën siglën, 'Shqipëria fiton', kreu i PD-së Lulzim Basha ka kristalizuar marrëveshjen me aleatët e tij për të shkuar së bashku në një koalicion në zgjedhjet e 25 prillit. Pjesë e këtij koalicioni, do të jetë PR e Fatmir Mediut, aleati më i vështirë për t'u bindur, LZHK-ja e Dashamir Shehit, PAA e Agron Dukës, PDK e Nard Ndokës, PBDNJ e Vangjel Dules, PDIU e Shpëtim Idrizit dhe Balli Kombëtar i Artur Roshit nga opozita parlamentare. Surprizë ishte bashkimi me FRD-në, parti kjo e themeluar nga ish- presidenti Bamir Topi, sot e drejtuar nga Sali Shehu. Nga ana tjetër, LSI do të garojë e vetme në zgjedhjet e 25 prillit. Report Tv bën me dije se LSI e PD do të dalin në një listë vetëm në qarkun e Dibrës dhe Kukësit. Një mënyrë e tillë, pra të dalurit me 2 lista të veçanta, sipas Bashës dhe Kryemadhit është bërë me qëllim maksimalizimin e votave për të rrëzuar qeverinë e e Edi Rama. Ky koalicion pritet të dorëzohet ditën e sotme në KQZ, ditë në të cilën përfundon edhe afati. Ndërkohë që mazhoranca do të jetë e vetme, ku siç ka deklaruar kryeministri Edi Rama, koalicioni i vetëm i PS-së do të jetë vetëm me qytetarët.