TIRANË- Pasi u shërua nga COVID-i, kryebashkiaku Erion Veliaj ka rrëfyer për mikrofonin e Report Tv betejën e tij 14 ditore me këtë virus. Ai ka sqaruar se ka qëndruar në karantinë për 14 ditë në shtëpi, dhe kurrsesi nuk ka qenë për mjekim të specializuar në Turqi apo në Itali . Një lajm i tillë, Veliaj e cilëson si një "sulm nën brez nga kundërshtarët", teksa nuk i ka kursyer ironitë për kundërshtarët e tij në opozitë.
"Nuk kam shkuar as në Turqi, aq në Itali. E di që kundërshtarët po gjejnë diku që të kapen, nuk jam kryetar bashkie që ka shtëpi në Hollandë, që për 6 muaj kap 4 vila. As kryetar bashkie që vë gjobë, jam një kryebashkiak që punoj më shumë dashuri. Nëse kundërshtarët kanë një alternativë më të mirë, meqë po afrojnë zgjedhjet, bujrum, por me rrena dhe sajesa, nëse isha duke vdekur dje në Turqi, s'mund të isha këtu fizikisht. Kështu për të gjithë ata, i mëshiroj, i kam falur", tha ndër të tjera Veliaj.
Ka qenë i pari djali i tij i vogël, Kajan që ka shfaqur simptoma, me temperaturë të lartë 38 gradë për 2 ditë rresht. Nisur nga fakti se është ende shumë i vogël, në pritje për t'i dalë dhëmbët e parë apo se mund të ishte një vizorë e stinës, Veliaj tha se nuk menduan se ishte infektuar me COVID-19. Por më pas të njëjtat simptoma pati edhe bashkëshortja, Ajola dhe më pas edhe ai. 10 ditët e para i cilëson si më sfiduese, ku çdo kockë e muskul i dhimbte, madje ishte aq i pafuqishëm sa të ngrihej nga krevati për të shkuar në tualet.