100 vjet Pavarësi, nga Shkupi
 mesazhe për bashkim kombëta

SHKUP- Mijëra shqiptarë nga treva të ndryshme të Maqedonisë festuan sot në Shkup 100 vjetorin e Pavarësisë. Mijëra flamuj kuq e zi dhe një shqiponjë me dy koka në sfondin e kuq kishin dekoruar kryeqytetin , dhe qytetet e tjera në veri dhe në perëndim të Maqedonisë ku jetojnë shqiptarë. Sirena makinash dhe turma njerëzish që valëvitnin flamujt kombëtarë janë parë gjatë gjithë ditës së djeshme.

Ceremonia festive me moton “100 vjet pavarësi” kulmoi në mbrëmje në sallën “Boris Trajkovski” ku ishin të pranishëm edhe kryeministri shqiptar Sali Berisha por dhe kryeministri i Kosovës Hashim Thaçi, kryetari i BDI-së, Ali Ahmeti, si dhe zëvendëskryeministrat e Qeverisë së Kosovës, Behgjet Pacolli dhe Hajredin Kuçi, lideri i LSI-së Ilir Meta, si dhe Rifat Jashari nga familja e Jasharajve nga Prekazi i Drenicës.

Mesazhe bashkimi kombëtar erdhën nga kjo sallë e tejmbushur me shqiptarë.Për kryeministrin e Shqipërisë ky 100-vjetor na fton të realizojmë një ëndërr, atë të bashkimit kombëtar, dhe u shpreh i lumtur që festimet e nisura në Shkup, do të vijojnë në Prishtinë e më pas në Vlorë e Tiranë.

"Askush të mos druhet, të mos irritohet nga përpjekjet e shqiptarëve për bashkimin e tyre kombëtar, se kjo synon përqendrimin, shpalosjen e energjive të tyre të pafundme, për të ndërtuar atë që u mungoi. Askush nuk duhet të harrojë se, shqiptarët u takuan me shekullin e ri, të lirë, por si një komb që kishte mbijetuar si një komb që padrejtësitë e mëdha nuk e kishin lejuar të ndërtojë të ardhmen. "- tha Berisha.

Ai kërkoi përqëndrimin e të gjithë energjive në bashkimin kombëtar të shqiptarëve.
"Shqiptarët presin nga ne që në projektin tonë europian si e ardhmja më e shkëlqyer e tyre, të realizojnë njëkohësisht projektin e bashkimit kombëtar të shqiptarëve, ndaj dhe nën moton të bashkohemi njëri me tjetrin, të bashkohemi me Europën le të përqendrojmë ne të gjithë energjitë tona."

Berisha në fjalën e tij tha se ndjehet i lumtur që shqiptarët po festojnë bashkërisht këtë shekull të pavarësisë së shtetit shqiptar dhe ngriti lart dhe luftën çlirimtare të UÇK-së.

“Pavarësisht çfarë përjetuam, kemi motive për të qenë krenarë me njëri tjetrin, me trojet tona me flamurin tonë, për të pasur besim tek e ardhmja. Shekulli që lamë mbrapa ishte shekulli i një kaluari, ata të cilët shpallën në Vlorë pavarësinë, shpallën pavarësinë e Shqipërisë. Shqiptarët nuk u pajtuam kurrë me padrejtësitë, nuk pranojmë shtypjen e të tjerëve, ndaj dhe bëmë një rezistencë legjendare, UÇK-të do zhvillonin luftën e fundit çlirimtare në Evropë" deklaroi Berisha.

THACI: NDERIM TE RENEVE NE LUFTEN E KOSOVES
Kryeministri i Kosovës përkujtoi të rënët në luftën e Çlirimit të Kosovës, si shenjë nderimi në këtë 100-vjetor, ndërsa e quajti Shkupin kryeqyteti i vilajetit të Kosovës. “Sot duhet të kujtojmë vetëm ku ishim para 13 vitesh, Shqipëria në tranzicion, Kosova e pushtuar, shqiptarët në Maqedoni të diskriminuar rëndë, në Presheve edhe më rëndë, shqiptarët në Mal të Zi në përpjekje për të drejtat e tyre. Por mrekullia ndodhi nga shpresa, besimi ynë, lindi UÇK që largoi njëherë e përgjithmonë Serbinë nga Kosova, sot e kemi të lirë, të pavarur dhe sovrane. Mrekullia e UÇK erdhi jo vetëm me vullnetin e shqiptarëve të Kosovës, pati mbështetje nga gjithë shqiptarët kudo që jetonin”, tha kryeministri Thaçi

Ai shtoi se e ardhmja tregon se duhet të punojmë për një komb të vetëm
"Shqiptarët si asnjë komb në rajon i kanë dy shtete Shqipërinë dhe Kosovën, por e ardhmja na tregon se ne duhet të jetojmë në një hapësirë unike si një komb i vetëm. Do jetojmë në një hapësirë të përbashkët e të integruar”, tha ai.

AHMETI: JETESUAM AMANETIN E SKENDERBEUT
Kryetari i BDI-së, Ali Ahmeti tha se jetësuam amanetin e Skënderbeut, Ismail Qemalit, Isa Boletinit.
"Askush të mos e keqkuptojë këtë festë kombëtare, sepse flamuri shqiptar është shumë më i vjetër se shteti shqiptar, një nga flamujt më të vjetër të Evropës.  Dhe ne sot po e festojmë Ditën e Flamurit dhe të Shpalljes së Shtetit Shqiptar. Ne jemi përcaktuar drejtë që të ndërtojmë lirinë, identitetin kombëtar dhe historinë edhe të bashkëqytetarëve tanë maqedonas, sepse e kaluara është e hidhur për të dyja palët.” ka shtuar Ahmeti.
“Ne duam që në këtë vend, të vendoset mirëbesimi i mirëfilltë, duam respekt të ndërsjellë. Ai që punon për historinë dhe për gjuhën e tij, ai nderon edhe të tjerët. "- shtoi më tej ai.


DIBRA E MADHE ZBUKUROHET KUQ E ZI
Dibra e Madhe e Maqedonisë, një komunë e banuar kryesisht nga shqiptarë, është veshur nga flamuri kuq e zi, mes të cilëve njëri me përmasa gjigante 50 metra i gjatë dhe 25 metra i gjerë, i cili ka mbuluar tërësisht një prej godinave të kësaj komune. Kryetari i komunës së Dibrës së Madhe, Argëtim Fida, tha për atsh se në 28 Nëntor, ditën e madhe për shqiptarët e gjithë trojeve, Dibra e Madhe do të përfaqësohet në Vlorë e më tej në Tiranë, nga një grup delegatësh që do të përfaqësojnë komunën.

(Foto, atsh, Dibra e Madhe ne feste)

FESTIMET, NXISIN DHE ZEMËRIM
Në Maqedoni jetojnë 2.1 milionë shqiptarë, dhe festimet kanë nxitur dhe pakënaqësinë e maqedonasve. ” Është ekzagjerim” thotë një maqedonas Jovan Krtevski për AP. “Nuk kam asgjë kundër flamurit apo festimeve por vendosja e kaq shumë flamurëve dhe në një mënyrë të tillë dhe me kaq zhurmë nuk ka të bëjë fare me festime, por të kundërtën të provokojë maqedonasit. Edhe kryetari i partisë Social Demokrate të Maqedonisë përshkroi vizitën e Gruevskit, i cili është në koalicion me BDI e Ali Ahmetit, në Shqipëri si një “provokim politik”

Në Strugën e stolisur me flamujt kuq e zi qytetarët kanë njoftuar për një flamur shqiptar të djegur, njofton agjencia e lajmeve INA.


Redaksia Online
(db/ sg/shqiptarja.com)

/Shqiptarja.com