15 fotografi të Rugovës në Tiranë
përmes syrit të Fahredin Spahisë

Ekspozita e Fahredin Spahisë “Rugova” është hapur në Bibliotekën Kombëtare të Tiranës si pjesë e Kalendarit të përbashkët kulturor të Ministrisë së Kulturës së Kosovës dhe asaj të Shqipërisë, ku pjesë e aktivitetit ishte edhe një konferencë shkencore për figurën njerëzore, politike dhe kulturore të Rugovës. Ekspozita do të qëndrojë e hapur deri ditën e shtunë në Tiranë. 

15 fotografi të ish presidentit Ibrahim Rugova janë pjesë e ekspozitës së fotografit Fahredin Spahija. Ato janë “rrëmbyer” me një fokusim të veçantë prej syrit të fotografit. Në punë e sipër ka arritur të lexojë emocionet e Ibrahim Rugovës, që janë më shumë se dhjetëra fjalë që mund të kumtojë një lider. 

“Unë këto foto nuk i kisha menduar t’i ekspozoja, -rrëfen për Shqiptarja.com, Fahredin Spahija. –Unë kam bërë punën time duke ndjekur ngjarjet. Kanë qenë çaste që më lidhin mua vetë me emocionet ose mbresat e atyre çasteve. Për mua këto fotografi ishin si një lloj ditari fotografik personal. Por Ministrija e Kulturës pati idenë që unë t’i eskspozoja.
 
Më thirrën nga Kabineti i ministrit të Kulturës Kujtim Shala, në fillim të janarit të këtij viti dhe më kërkuan që të realizojë një ekspozitë me fotografi të zgjedhura të Rugovës. Kjo më preokupoi dhe emocionoi njëkohësisht. Për më shumë se tri javë isha i preokupuar me përzgjedhjen e imazheve që kishin ngrirë para aparatit tim nga angazhimet politike të Rugovës në periudhën e pasluftës deri në momentin kur në janarin e acartë të vitit 2006, ish presidenti u varros në varrezat e Velanisë.”, rrëfen Spahija, duke theksuar se Fotografitë shpërfaqin angazhimin politik të Rugovës, adhurimin që populli i Kosovës e kishte dhe e ka për të si në kohën sa ishte i gjallë po ashtu edhe kur ndërroi jetë si dhe portrete të realizuara në rezidencën e tij, në Velani.
 







 FOTO

Redaksia Online
Al.N/Shqiptarja.com