17 muaj në pandemi, bizneset 'nuk nxjerrin mësim', 48 % e tyre pa plan emergjence: Do investojmë në teknologji e fuqi punëtore

Pas 17 muajsh nga fillimi i pandemisë COVID-19, bizneset në vend akoma nuk janë të bindura për të miratuar një plan emergjence për kriza të tilla. Sipas një ankete të realizuar nga Këshilli i Investimeve rezulton se vetëm 52% e kompanive të pyetura janë të gatshme për të miratuar një plan emergjence, ku janë të përcaktuara masat dhe hapat që do të ndiqen në rast të një krize në vitet në vijim. Ndërsa pjesa tjetër e bizneseve janë të pavendosura dhe kundër miratimit të këtij plani.

Biznesi i madh me xhiro mbi 14 milionë lekëështë më i gatshëm për të pasur një plan rezervë edhe pse ishte një nga kategoritë që pati ndikimin më të ulët nga pandemia, ndërsa kategoria me interesin më të ulët për një plan emergjence është biznesi i vogël me xhiro deri në8 milionë lekë.

Bujqësia edhe pse ishte ndër të paketat sektor që nuk e ndaloi aktivitetin gjatë pandemisë duket se është sektori më i ndërgjegjësuar. 70% e ndërmarrjeve në këtë sektor janë të gatshme për të bërë një plan emergjence ndërsa 30% janë ende të pavendosur. 

Ndërkohë të gjithë sektorët pohojnë rënie të xhiros, ulje të aktivitetit, largime nga puna dhe pasiguri për të ardhmen si pasojë e COVID-19, por nga ana tjetër pandemia ka ndryshuar fokusin e investimeve për bizneset.

Sytë tashmë janë tek teknologjia, jo vetëm për të fuqizuar punën online por edhe për të investuar në pajisje të reja. Sipas anketës nga bujqësia, tregtia, shërbimet, turizmi, ndërtimi apo industria fokus kanë menaxhimin e riskut nga krizat dhe investimin në teknologji të reja.

Po ashtu duke qenë se këtë vit të gjitha bizneset po përballen me mungesë të fuqisë punëtore, ata janë përgjigjur se një nga investimet që do të kryejnë në vijim është aftësimi profesional i punonjësve. Industria, turizmi dhe shërbimet janë tre sektorët qërenditen në krye për investimin në aftësim profesional.

/LR/Shqiptarja.com

TAG:
• bizneset
• koronavirus ne shqiperi