'20 vite nepotizëm e krahinalizëm' Meta premton ti japë fund: Shumë shpejt ndryshime statutore në Partinë e Lirisë

Partia e Lirisë mblodhi sot Komitetin Drejtues Kombëtar, një ditë pas mbledhjes së Kryesisë, për të votuar vendimet e marra dhe për të krijuar kushtet e nevojshme për ndryshimin e situatës politike dhe sociale në Shqipëri.

Me ton të ngritur Meta paralajmëroi ndryshim të statutit, dhe duke bërë 'një mea culpa' tha që do të ndalojë nepotizmin dhe krahinalizmin dhe të realizojë një parti model.

“Do ta fillojmë nga shtëpia jonë. Me rregulla të qarta. Kur linja politike është e qartë, thoshte një diktator, nuk e ka thënë gabim, faktor vendimtar mbetet organizimi. Ne kemi shumë për të bërë. Nisim një histori të re për 20 vite që do të vijnë se kemi 20 vjetorin e krijimit të LSI. Ne duhet të ndahemi një herë e përgjithmonë nga nepotizmi e krahinalizmi, sepse kanë qenë probleme për ne në këto 20 vite e kanë ndikuar në disa vendime të gabuara që i kanë kushtuar vendit.

LEXO EDHE:
Frrok Çupi: Një intervistë që nuk do përgjigje për shkak se është e qartë

Në një vend si i yni, ku të gjithë njohin njëri tjetrin, nepotizmi duhet të jetë me rregulla të qarta.

Sepse një parti që jep shembullin në këtë drejtim është e besueshme ta bëjë dhe nesër në shtet, në tatime, administratë e kudo. Shumë shpejt do të kemi ndryshime statutore. Dikush më thotë si mund ta bëjmë. Do ta bëjmë shumë herë më mirë seç i ka bërë Ilir Meta kur ishte kryeministër 30 vjeç e papërvojë. U tha u bë!' tha Meta. 

Komiteti Drejtues Kombëtar miratoi sot 5 prioritetet kryesore pwr 10 vitet e ardhshme të Partisë së Lirisë:
1. Ndalimi i shpopullimit.
2. Rritja e pensioneve mbi nivelin e mesatares së rajonit brenda një mandati qeverisës.
3. Arsimi dhe investimi tek kapitali njerezor:
4. Bujqësia, ushqimi dhe ulja e kostos së jetesës.
5. Shqipëria, fuqi eksportuese.

S.G/N.Xh/Shqiptarja.com

TAG:
• Partia e Lirise
• Ilir Meta