24 vjet nga rrëzimi i bustit, Basha i vetëm pa Berishën e dhjetoristët
PD ka festuar sot 24 vjetorin e rrëzimit të bustit te diktatorit, por ajo qe vihej re ishte mungesa e ish-kreut historik të së djathtës Sali Berishës si dhe emrave të tjerë të njohur të cilët bënë historinë e dhjetorit dhe rrëzuan bustin e Hoxhës. VIDEO
TIRANE - Sot opozita ka gjetur rastin që të akuzojë qeverinë Rama- Meta se është mishërim i pushtetit enverist. Partia Demokratike ka festuar sot 24-vjetorin e rrëzimit të bustit të Enver Hoxhës.
Në ceremoninë e sotme të përkujtimit të kësaj datë mbështetësit kanë qenë më të paktë. Këtë herë PD kishte zgjedhur që të flisnin me radhë disa nga ata që e kanë përjetuar këtë periudhë ose edhe qytetarë të cilët vijnë me plane të reja për demokracinë dhe të ardhmen.
Ajo që vihej re në këtë ceremoni ishte edhe mungesa e ish-kreut historik të së djathtës Sali Berishës si dhe emrave të tjerë të njohur të cilët bënë historinë e dhjetorit. Kreu i PD Lulzim Basha në fjalën e tij tha se tashmë po jetojmë në një kohë kur ata që na qeverisin janë glorifikim i pushtetit të Hoxhës.
Sipas Bashës e gjithë kjo tregon nostalgjinë që kjo qeveri ka për diktatorin dhe politikën e tij. “Hoxhizmi dhe diktatura nuk duhet të kthehen më, ne nuk duhet të lejojmë që të tilla politika të rikthehen sërish,” – kështu u shpreh kreu i PD Lulzim Basha.
Sipas tij me anë të politikës së mazhorancës rrezikohet gjithçka, çdo pasuri publike dhe e mirë që vendi ka arritur deri më tani. “Nëse nuk i vemi kufi të keqes, ajo rrezikon që të përsëritet,” – tha Basha.
Ndërkohë të pranishmit e tjerë që morën pjesë në ceremoni thanë se i duhet thënë stop miteve të diktaturës të cilat janë krijuar si pasojë e qeverisjes Rama-Meta. Po ashtu ata kërkuan që në kuvend të ketë një përfaqësi më të madhe të dhjetoristëve pasi ata janë përfaqësimi më i mirë i politikave.