Maqedonia e Veriut 28-vite pavarësi! Meta-Pendarovskit: Forcojmë marrëdhëniet mes popujve tanë

Republika e Maqedonisë Veriore sot e shënon 28-vjetorin e pavarësisë së saj nga ish-federata jugosllave, përmes një referendumi popullor, i cili e shpalli atë shtet të pavarur dhe sovran. Në lidhje me këtë kanë ardhur edhe urimet e para nga politika shqiptare.

Rendit zhvillimet sipas orarit:
Ora 11:58
Pavarësia e Maqedonisë/ Ruçi letër homologut Talat Xhaferri: Vendet tona drejt kurorëzimit për çeljen e negociatave

Kryetari i Kuvendit, Gramoz Ruçi, i ka dërguar sot një letër urimi Kryetarit të Kuvendit të Maqedonisë së Veriut, Talat Xhaferi, me rastin e 28 vjetorit të pavarësisë. Ruçi shkruan në letrën e tij se Shqipëria dhe Maqedonia e Veriut janë dy vende fqinje, e mike, në një partneritet të ngushtë në kontributin e tyre për zhvillimin, paqen dhe sigurinë në rajon duke vënë theksin në procesin e hapjes së negociatave me Bashkimin Europian.

Letra e plotë

I dashur Talat,
Me rastin e 28 vjetorit të pavarësisë së Maqedonisë së Veriut, në  emër të Kuvendit të Shqipërisë dhe timin personal, Ju dërgoj urimet më të mira për përparimin e Republikës së Maqedonisë së Veriut, mirëqenien e qytetarëve të saj dhe suksese në rrugëtimin e saj europian.
Nëpërmjet Jush i dërgoj urimet më të mira Kuvendit të Republikës së Maqedonisë së Veriut, qytetarëve të vendit tuaj dhe një urim vllazëror shqiptarëve që jetojnë në Maqedoninë e Veriut. 
Shqipëria dhe Maqedonia e Veriut janë dy vende fqinje, e mike, në një partneritet të ngushtë në kontributin e tyre për zhvillimin, paqen dhe sigurinë në rajon.
Shqipëria dhe Maqedonia e Veriut janë dy vende me një rol vendimtar në zhvillimin, paqen dhe stabilitetin në rajon.
Të dy vendet tona janë aktualisht drejt kurorëzimit të përpjekjeve të tyre për çeljen e negociatave të pranimit me Bashkimin Europian.
Jam i lumtur të konstatoj se shqiptarët që jetojnë në Maqedoninë e Veriut kanë dhënë një kontribut të pazëvëndësueshëm në zhvillimin, përparimin e stabilitetin e vendit si edhe përshpejtimin e proceseve të integrimit europian dhe atlantatik.

Ora 11:28
Meta mesazh Pendarovskit për 28-vjetorin e Pavarësisë: Forcojmë marrëdhëniet mes popujve tanë


Presidenti i Republikës Ilir Meta me anë të një mesazhi të gjatë dërguar homologut të tij në Maqedoninë e Veriut, Stevo Pendarovski i ka uruar këtij shteti 28-vjetorin e Pavarësisë.

Ndër të tjera në mesazhin e tij Meta ka shkruar se marrëdhëniet e shkëlqyera midis dy vendeve do të vijojnë që të forcohen edhe më shumë.

Presidenti Meta thekson se marrëdhëniet e mira midis dy vendeve japin një forcë të madhe për stabilitetin dhe integrimin euroatlantik të të dy vendeve.

Mesazhi i plotë i Metës:

"28-vjetori i Ditës së Pavarësisë së Republikës së Maqedonisë së Veriut, më jep kënaqësinë e veçantë që të përcjell, në emrin tim dhe të popullit shqiptar, urimet e përshëndetjet më të ngrohta, të përzemërta e vëllazërore për Ju dhe të gjithë qytetarët Tuaj. Shpreh bindjen time se, falë edhe vullnetit, eksperiencës dhe vizionit Tuaj, marrëdhëniet e shkëlqyera të fqinjësisë e të bashkëpunimit, që ekzistojnë ndërmjet vendeve dhe popujve tanë, do të forcohen më tej në të ardhmen.

Dëshiroj të theksoj se një ndikim shumë të madh në forcimin e marrëdhënieve midis dy vendeve ka luajtur dhe luan adresimi dhe përmirësimi i vazhdueshëm i marrëdhënieve ndëretnike. Jemi krenarë për kontributin jetik që shqiptarët në Maqedoninë e Veriut japin për stabilitetin dhe integrimin euroatlantik të vendit. Jam i bindur se komuniteti maqedonas në vendin tonë do të vijojë të jetë një urë e fortë miqësie dhe bashkëpunimi ndërmjet dy vendeve dhe popujve tanë.

Përfitoj nga rasti t’Ju përgëzoj për vizionin dhe guximin në arritjen e Marrëveshjes historike të Prespës – një shembull për gjithë rajonin - që jo vetëm do të forcojë perspektivën euroatlantike të vendit Tuaj, por do ta bëjë rajonin tonë edhe më të sigurtë. Jam i bindur se vendet tona do të bashkëpunojnë ngushtësisht në kuadër të Aleancës së Atlantikut të Veriut, si dhe në rrugëtimin e përbashkët drejt Bashkimit Evropian.

Së bashku me urimet më të mira e të përzemërta për zhvillimin e përparimin e mëtejshëm të vendit Tuaj, ju lutem pranoni, Zoti President, shprehjen e konsideratës sime më të lartë." 

/r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Berisha-Meta e partitë e vogla bashkë për zgjedhjet vendore, a mendoni se fitojnë përballë PS?



×

Lajmi i fundit

Kallëzimi ndaj Autoritetit të Dosjeve, prokuroria refuzon padinë e Ilir Metës: Nuk nisin hetimet, s'ka vepër penale

Kallëzimi ndaj Autoritetit të Dosjeve, prokuroria refuzon padinë e Ilir Metës: Nuk nisin hetimet, s'ka vepër penale