Ish-kreu i komisionit hetimor për skandalin CEZ, Taulant Balla, dhe ish-juristi i OSHEE, Romeo Kara, kanë dalë nga Gjykata e Tiranës, ku kërkuan të mos pushohet hetimi për këtë skandal nga Prokuroria. Jashtë dyerve të gjykatës, ish-juristi Kara hodhi akuza të forta ndaj prokurores që mbylli hetimin ndaj skandalit CEZ, duke thënë se ajo nuk e ka lexuar fare dosjen prej më shumë se 5 mijë faqe.

Romeo Kara theksoi se Prokuroria nuk ka dashur të konstatojë dëmet e mëdha të shkaktuara nga ky skandal, ndaj dhe ka mbyllur çështjen.

“Emailet e Nuel Kalajt kompromentojnë tërësisht çështjen. Prokuroria nuk ka dashur të konstatojë se ka dëmet. Komisionet e transparencës janë ngritur në kundërshtim me ligjin. Nuk ka pasur dëshirë as të komunikojë me mua. Konstatoj se një dosje mbi 5 mijë faqe nuk mund të studiohet për dhjetë ditë, më 29 prokurorja kërkoi pushimin e çështjes. Për mua prokurorja nuk e ka lexuar dosjen, ka marrë një porosi politike nga zyrat dhe skutat e errëta të Prokurorisë.

Kërkoj që opinioni publik të marrë përgjegjësitë e veta, populli të marrë përgjegjësitë e veta, po luhet me pasuritë e tij. Janë bërë dëme të pafund, është bërë një procedurë e dështuar. Nuk mban kush përgjegjësi, populli të marrë përgjegjësitë e veta, unë do jap argumente”, tha Kara. 

Nga ana tjetër, edhe ish-kreu i komisionit hetimor të skandalit të CEZ, Balla, hodhi akuza të forta ndaj Prokurorisë, teksa bëri një sërë pyetjesh në lidhje me hetimin e mbyllur nga organi i akuzës.

"Shqiptarët dhe shteti shqiptar kanë humbur rreth 414 mln euro.  5401 faqe, prokurorja që ka marrë përsipër të administrojë çështjen, ka marrë vetëm 10 ditë kohë. Rreth 540 faqe në ditë do duhej të lexonte ajo. Kush janë këta prokurorë që guxojnë të mos e marrin fare në konsideratë, por për 10 ditë merr vendime që këtë hetim ta mbyllë? Në dhjetë ditë vendosin të mos bëjnë asnjë hetim. Kush janë këta prokurorë që nuk thirrin njëherë të vetme Nue Kalajn? Si ka mundësi që mbyllen dosje pa fund me akuza të rënda? Këtu na vijnë prokurorë që janë ende një shqetësim, edhe për pak kohë, për mënyrën si duhet të funksionojë sistemi i hetimit dhe ai i drejtësisë. Apo një Prokurori të fortë, unë do ju ftoja të gjithëve të njiheni me materialin e sotëm në gjykatë. Bëhet diferencë e madhe se çfarë ka bërë Prokuroria. Isha sot këtu për të thënë se hetimi i Kuvendit është i plotë dhe gjykata jo vetëm nuk do ta mbyllë këtë çështje, por do kërkojë hetimin shumë të thellë të saj për të nxjerrë fajtorët.

Nëse ka 100 çështje në të cilat ka vepër penale, nga ana e Prokurorisë nuk është hetuar asnjëra prej tyre. Komisioni Hetimor Parlamentar ka referuar prova që nuk kanë qenë hetuar kurrë më parë. Njëra ndër to është konstatimi më skandaloz, sipas tyre ‘po ekzistojnë disa transferta bankare te shtetasi Nue Kalaj’ dhe sipas prokurorisë thuhet se ky person këto para t’i ketë transaksion. Në rast se në Shqipëri prokuroria arrin të mbyllë hetimet, në Çeki ku funksionon CEZ, Prokuroria vazhdon hetimin", tha Balla.

d.c./shqiptarja.com