Gjatë gjashtëmujorit të parë të vitit, kredia e dhënë nga sektori bankar për individët është zgjeruar me 2.51% në terma vjetorë. Zgjerimi i kredisë është mbështetur te kredia në lekë, që është rritur me 8.9%, ndërsa kredia në valutë ka rënë me 3.2%. Politika monetare lehtësuese është reflektuar mjaft mirë në interesat e tregjeve financiare, çka e ka ulur edhe kredinë në nivelet më të ulët historik.
Diferencat në interesat mesatare mes kredisë në lekë dhe asaj në euro janë ngushtuar ndjeshëm, çka ka bërë që individët të mos kenë shumë arsye të marrin përsipër rrezikun e kursit të këmbimit, nëpërmjet kredisë në euro. Interesi mesatar i huave të reja në lekë për 9-mujorin e këtij viti ishte 8.2%, nga 8.8% që ishte për të njëjtën periudhë të një viti më parë.