613 kg kokainë, policia kërkon
gjurmët e gishtave në kamionArbri-Garden ka dhe 2 kontenierë të tjerë në Port

MAMINAS - Report TV ka mbërritur sërish sot pranë magazinës së “Arbri-Garden” në Maminas, ku një ditë më parë u zbulua sasia rekord prej 613 kg kokainë, e ardhur me kontenier nga Kolumbia, nën kamuflazhin transportimit të bananeve. Siç raporton i dërguari i Report Tv në Maminas, gazetari Driçim Çaka, kamioni i cili mori ngarkesën në Portin e Durrësit qëndron i palëvizur në kapanonin e “Arbri-Garden”, pasi do t’i nënshtrohet ekspertizës për shenjat e gishtërinjve dhe provave të tjera shtesë. 

Oficerë të Policisë së Shtetit mbajnë në vëzhgim 24 orë kamionin. Ata nuk lejojnë asnjë person t’i afrohet automjetit. Po mbahet në vëzhgim jo vetëm kamioni me kokainë, por edhe disa persona të tjerë. Në momentin e skanimit në Portin e Durrësit kontenieri i kokainës është klasifikuar me ngjyrë portokalli, çka do të thotë se aty nuk është konstatuar asgjë e kundraligjshme. 

Report Tv ka mësuar se dyshimet e policisë janë shtuar kur pranë autoritetit portual ka mbërritur shoferi i Arbri-Garden, Armando Pezaku, i cili ka kërkuar që të marrë në dorëzim ngarkesën me kamionin me targa DR 1938 E duke iu kujtuar autoriteteve se kontenieri i ishte nënshtruar kontrolleve me skaner në Itali dhe për këtë arsye nuk është i nevojshëm një rikontroll në Durrës. Pasi ka kaluar në skaner, kokaina nuk është konstatuar, por dyshimet e policisë se në kontenier ndodhej ngarkesë e paligjshme kanë qenë mjaft të mëdha.

Nisur nga këto dyshime, policia ka mbajtur në vazhdim ngarkesën derisa është marrë në dorëzim nga përfaqësuesit e Arbri-Garden dhe është dërguar në kapanon, në Maminas. Policisë i është dashur ndihma e shërbimit zjarrfikës për të çarë me mjete prerëse dyshemenë e dyfishtë të kontenierit ku edhe u zbuluan 613 kg kokainë e ndarë në 528 pako të cilat kishin mbishkrime me kodet e trafikantëve.

Prokuroria ka vendosur sekuestrimin e pronave të “Arbri-Garden”. Gjithashtu po kryhen edhe disa verifikime të tjera të pronarit të shpallur në kërkim Arbër Çekaj, i cili mendohet se fshihet në Gjermani. Arbri-Garden ka edhe dy kontenierë të tjerë në Portin e Durrësit, të cilët pritet t’i nënshtrohen skanerit, por edhe kontrolleve të imtësishme të Policisë së Shtetit.  

Redaksia Online
l.q/Shqiptarja.com