Ndeshja e javës së 26-të mes Korabit dhe Partizanit e luajtur në stadiumin “Selman Stërmasi” përfundoi 2-0 për kryeqytetasit që me pak sforco arrijnë të marrin maksimumin. Skuadra e drejtuar nga Starova e zgjidh gjithçka në dy minuta. Demat e kuq kalojnë në avantazh në minutën e 31-të falë një autogoli të Prençit.
Pas një aksioni të bukur të Partizanit Fili fut një top në zonë dhe aty Prençi është i pafat pasi topi i përplaset në trup dhe përfundon në rrjetë. Një minutë më pas shënon edhe sulmuesi Ekuban mjaft bukur me një gjuajtje në limitet e zonës.
Në pjesën e dytë Partizani kontrollon duke siguruar tre pikët e radhës që e ngjisin në krye. 52 pikë për Partizanin po aq sa Kukësi dhe dy skuadrat ndajnë vendin e parë.
Festë ka edhe në Kurbin. Laçi ka fituar minimalisht duelin e mbijetesës ndaj Flamurtarit 1-0.Golin e fitores për bardhezinjtë e shënoi Ansi Nika në minutën e 58-të.3 pikë shprese për Laçin që i largohet zonës së ftohtë ndërsa fundosen vlonjatët që me renditjen aktuale janë një kategori më poshtë.
(d.b/Shqiptarja.com)