POP 5

Lajmet më të lexuara të 5 minutave të fundit

Vrasja Salihut dhe qetësia që vjen nga frika

Vrasja e Sali Mulosmanit ka rikthyer në qytetin verior ankthin e muajve më parë, ku çdo ditë pritej një vrasje e re. Megjithëse ekziston një qetësi normale, tropojanët jetojnë me idenë se dikush tjetër do të vritet
TROPOJE(16/6/2000) Vrasja e Sali Mulosmanit ka rikthyer në qytetin verior ankthin e muajve më parë, ku çdo ditë pritej një vrasje e re. Megjithëse ekziston një qetësi normale, tropojanët jetojnë me idenë se dikush tjetër do të vritet, dhe historia do të vazhdojë pafundësisht nën mantelin e hakmarrjes... Edhe pse ka ndodhur një vrasje jo fort e vogël dhe me pasoja, njerëzit në mungesë të punës vazhdojnë të rrinë në lokale dhe të rrufisin kafe, duke biseduar nën zë temën e ditës që për subjekt ka të fortët dhe fiset e Tropojës. Qetësia e frikshme Ulur në kafen pranë Bashkisë së qytetit që normalisht ka të njëjtin emër - ngado që të zgjasësh veshët për të dëgjuar - dëgjon të njëjtën fjalë: "Mirë që u vra ky, po kush e ka radhën tani?". Eshtë fjala për të jatin e njërit nga të fortët e Tropojës, Jaho Salihit. As përplasja e Bërishës me UNMIK-un nuk e ka tërhequr dot vëmendjen nga ajo çka ndodh në qytetin e tyre këto vitet e fundit. Diskutimi vazhdon të sillet rreth vrasjes, por e gjithë kjo thuhet aq nën zë, sa duket se ata flasin me vete dhe jo me shokun, me të cilin përditë pinë kafenë apo një "birrë Peje", siç është bërë zakon tashmë. Pra, frika është bërë e pandarë në jetën e malësorëve të qyteti të vogël. Ata kanë frikë nga ajo se çfarë mund të ndodhë në ditët që do të vinë. Kanë frikë se mos ndoshta ajo që ia kanë më shumë frikën mund t'i gjejë rastësisht në vendin e gabuar. "Këtu mund të ndodh gjithçka, por e keqja është se ndodh atëherë kur nuk e pret", kështu thotë një burrë rreth të dyzetave, që emrin na lutet që të mos ia përmendim në Gazetë, pastaj vazhdon të pijë kafenë nën shoqërinë e mikut të tij, që i ka ardhur nga fshati. Ankthi rritet Të 95 të vrarët e hakmarrjes të ndodhura në këto vitet e fundit, që janë më shumë se tepër për një qytet të vogël si Bajram Curri, duket se nuk u bëjnë më përshtypje tropojanëve. Ato janë një pjesë e jetës së tyre të mbytur nga ankthi, që tashmë janë bërë një gjë e zakonshme. Biseda nga ajo ç'ka ndodhur, si padashur kalon në atë që pritet të ndodhë. Qetësia, që duket në pamje të parë, i tremb më shumë njerëzit, duke u shtuar më shumë ankthin. Dikush thotë se Jaho Salihi është parë pas kaq kohësh në qytet dhe kjo ka ndodhur vetëm një ditë pas vrasjes së babait të tij Sali Mulosmani. Padashur bëhemi edhe ne pjesë e të njëjtit realitet të frikshëm. Ulemi në një kafe tjetër dhe historia vazhdon të jetë e njëjta si ajo e dëgjuar në kafe "Bashkia". "Kemi mbaruar si rreth, kushedi kë do të kapë lista e vrasjeve tashti", thotë një plak, duke shprehur edhe habi nga pyetjet tona prej gazetari dhe pastaj shton: "Hakmarrja do vazhdojë, edhe pse na duket sikur jena në qetësi, besa po tutem se nuk ash mbyll me kaq". Në çdo tavolinë dhe në xhiron e mbrëmjes për këta njerëz duket frika dhe pasiguria që kanë për të nesërmën edhe pse asnjëri prej tyre nuk ka lidhje me historitë e "Far West-it shqiptar". Specialët sjellin frikë Nuk janë shumë, por në qytetin verior lëvizjet e tyre ngjallin një lloj dyshimi. Jo për ta, fjala është se ata për njerëzit e thjeshtë nuk kanë ardhur kot në Tropojë. Një nga tre furgonët e specialëve bën xhiron e zakonshme, por me pak më shumë shpejtësi se zakonisht. Të gjithë njerëzit kthejnë kokën dhe vështrojnë se për ku janë nisur dhe në mendje u shkon vetëm "se çfarë mund të ketë ndodhur". Madje, më kurështarët edhe e ndjekin me vrap për ta parë veprimin e tyre. Edhe pse prej 5 muajsh ata janë bërë një pjesë e pandarë e qytetit, përsëri prania e tyre sjell një ndjenjë të çuditshme për ta. "Ata shkojnë aty ku ka probleme dhe kjo sjell frikë", thonë qytetarët dhe për një moment marrin rrugën për në shtëpi. Ku janë të fortët Ka shumë kohë që në rrugët e qytetit mungojnë ata, për të cilët flitet në çdo bisedë. Të fortët e Tropojës janë "fshehur" ose më saktë nuk kanë shumë dëshirë të dalin në rrugë, ku të gjithë i njohin. Emrat e njerëzve që përbëjnë fiset më të fuqishme kanë vënë njëfarë statukoje me qytetin dhe janë tërhequr në kullat e tyre ose janë larguar në Kosovë, ku kanë gjetur më shumë siguri. Por, megjithatë, kjo nuk i qetëson njerëzit. Një ditë ata mund të rishfaqen, edhe pse për pak, duke shtuar edhe një emër tjetër në listën e gjatë të hakmarrjes në Tropojë, që deri tani numëron jo pak, por 97 emra, që të gjithë të vrarë.

//Shqiptarja.com
  • Sondazhi i ditës:

    Mendoni se lufta ndaj nëndeklarimit të pagave do rrisë ndjeshëm pensionet?

Lajme të tjera



×

Lajmi i fundit

Atentati në Shkodër/ Policia dyshime se një person i tretë ishte në makinë me Licin dhe Bushatin! Gjurmë gjaku dërgohen për ekspertim

31 Tetor, 13:07