Studiuesit kërkuan të hedhin dritë mbi diferencat gjinore sa i përket ndërprerjes së duhanit, një fakt që ata vetë dikur e kanë përcaktuar si një legjendë, ku kanë theksuar mungesën e të dhënave të besueshme shkencore për këtë.
Sipas drejtuesve të studimit këtë herë u zgjerua horizonti i vëzhgimit ku përveç Mbretërisë së Bashkuar në studim u përfshinë Kanadaja dhe SHBA për të parë se sa e vërtetë është fakti se femrat e kanë më të vështirë të lënë duhanin sesa gjinia tjetër.
Rezultatet e studimit nuk arritën të provonin sërish faktin se femrat shkëputen më me vështirësi nga duhanpirja dhe për pasojë studimi u fokusua më shume tek mosha dhe ndikimi që ka ajo për lënien e duhanit.
Sipas rezultateve të studimit femrat nën moshën 50 vjeç janë më të prirura për lënien e duhanit, veçanërisht ato femra të moshës 20 – 30 vjeç. Ndërsa sa i përket femrave mbi moshën 60 vjeç, ato e kanë më të vështirë të shkëputen nga duhanpirja por e kundërta ndodh me gjininë tjetër, meshkujt, të cilët e kanë më të lehtë t’i thonë lamtumirë cigares në janë në moshë të madhe.
Alessandro Oliva, një specialist i sëmundjeve të frymëmarrjes pranë qendrës për trajtimin kundër duhanpirjes në një spital të Torinos ka pohuar se “ka momente në jetën e njerëzve ku motivimi për të hedhur një cigare është gjithmonë i fortë”.
Gratë gjatë periudhës së shtatzënisë, kur vendosin për një të ardhme të shëndetshme të fëmijëve të tyre, pa asnjë mëdyshje heqin dorë nga duhanpirja, ndërsa meshkujt kur e shikojnë se sëmundjet e tyre të lidhura me duhanpirjen përkeqësohen i japin fund dashurisë tyre për duhanin, u shpreh specialisti.
Përfundimet e studimit treguan qartë se vendosmëria për të lënë cigaren nuk ka lidhje më të ngushta më gjininë e personit sesa më karakterin dhe rrethanat e tij.
(eb/shqiptarja.com)
![](https://www.shqiptarja.com/template/img/sh_logo1.png)