A mund të shpëtojnë romët nga Florenc Hoxha?

Çfarë e shtyn kryetarin e Policisë Bashkiake të Tiranës, z. Florenc Hoxha të dalë personalisht edhe në 1.30 të mëngjesit e të sekuestrojë biçikletat e romëve mbushur me kanaçe e shishe plastike? Eshtë realisht ky problemi më i madh që ka kryeqyteti në këtë kohë? Dhe nëse është, – gjë që na lë ta kuptojmë nga aksioni vetjak e pasionant i kryepolicit – askush nga Bashkia nuk e ka shpjeguar për publikun këtë. Nuk ka asnjë transparencë dhe shpjegim për publikun. 

Në një vit jetë të administratës së re të kryebashkiakut Lulzim Basha prioritetet e tij për Tiranën na duken pak me shije të çuditshme: Mbjell pemë në sheshin Skënderbej nga një anë, dhe nuk shqetësohet minimalisht të presë pemë të tjera dhjetëra e qindra vjeçare që zbukurojnë kryeqytetin.
Rikthehemi te romët dhe te mbledhja e kanaçeve. Gazetari i Shqiptarja.com, Habjon Hasani, kthehej në shtëpi mbrëmjën e dy ditëve më parë. Dihet, gazeta përgatitet vonë dhe rrugëve të Tiranës në 1.30 të mëngjesit sheh kryesisht policë të rrugores, pak të rinj dhe gazetarët dhe dizajnerat e shtypit të shkruar që mbyllin punën e tyre pas mesnate. Prej pak kohësh, fare rastësisht, cilido mund të hasë në këtë orë dhe kreun e policisë bashkiake, zotin Florenc Hoxha, i cili ndjek romët me biçikletat e tyre kudo. Në çdo rrugicë dhe kosh plehrash. 

Skena e romëve të bllokuar me biçikletat e tyre plot me kanaçe, në rrugën Don Bosko, filmuar dhe transmetuar nga A1Report në 1.30 të mëngjesit janë shqetësuese. Nëse Bashkia nuk shpjegon publikisht rëndësinë e këtij operacioni, rreziku vjen nga ndonjë fobi patologjike në zhvillim dhe nëse është kjo, romët janë vërtetë në rrezik.