A1 Report dhe Shqiptarja.com:
Ja si do të mbulojmë zgjedhjet

TIRANE - Nëse doni të dini rezultatin paraprak të zgjedhjeve mjafton të ndiqni televizionin A1 Report, apo të klikoni në faqen online www.shqiptarja.com
 dhe në çdo moment do të informoheni në kohë reale.

Falë bashkëpunimit të A1 Report dhe Shqiptarja.com do të vijnë me një sërë risish për shikuesit dhe përdoruesit e internetit.

Drejtori i televizionit "A1 Report", Ilir Babaramo shpjegon se në të gjithë qarqet janë shpërndarë vëzhguesit e televizionit, të cilët do të raportojnë në kohë reale rezultatet paraprake. Ndërkohë që stafi i "A1 Report", i gazetës print "Shqiptarja.com" dhe faqja e saj online do të funksionojnë si një ekip i vetëm për të sjellë në kohë reale rezultatin paraprak të zgjedhjeve të së dielës, por edhe pasqyrimin minutë pas minute të votimit në të gjithë vendin.

“Unë  shpresoj se shikuesit shqiptarë do ta marrin vesh rezultatin paraprak të zgjedhjeve nga A1 Report. Për këtë arsye ne kemi ngritur një rrjet të tërë korrespondentësh dhe bashkëpunëtorësh, që në mënyrë kapilare mbulojnë të gjitha qendrat e numërimit dhe në kohë reale, online do të nisin rezultatin e zgjedhjeve. Forca e kompanisë sonë mediatike qëndron mbi të gjitha te fuzioni, sinergjia që krijohet mes tre komponentëve të kompanisë, televizionit A1 Report, faqes online Shqiptarja.com dhe gazetës print”- thotë Babaramo.
 
Transmetimi në A1 REPORT do të nisë në orën 06:00 të mëngjesit për të vijuar më shumë se 48 orë pa ndërprerje e ku qëllim kryesor do të jetë dhënia me saktësi dhe shpejtësi e të dhënave paraprake e zgjedhjeve parlamentare.

Redaksia online
(sg/shqiptarja.com)