AAK: Dështimet 100 ditëshe të qeverisë në fushën e sigurisë

/ATSH/.- Partia Aleanca për Ardhmërinë e Kosovës sot përmes një deklarate për shtyp akuzon qeverinë Mustafa, pasi është treguar e paaftë për të krijuar besueshmëri përballë sfidave të politikave të mbrojtjes dhe të sigurisë në të gjithë sektorin e sigurisë në vend.
AAK ka renditur në 12 pika dështimet e qeverisë Mustafa në 100-ditëshin e qeverisjes në fushën e sigurisë dhe të mbrojtjes.
"Qeveria ka dështuar në krijimin e sigurisë dhe besimit te qytetarët, ku si rezultat i kësaj mossigurie, ikën mbi 100 mijë qytetarë nga Kosova. Qeveria (MFSK) nuk arriti akoma procedimin dhe amandamentimin e ligjit për FAK-un, njëherit nuk arriti t'i realizojë detyrimet kushtetuese, e që duhet të jetë Ushtria e Kosovës. Qeveria akoma nuk ka krijuar një klimë sigurie dhe mirëbesimi për sigurinë e qytetarëve kundër shkallës së nxitjes së terrorizmit dhe përhapjes së tij edhe në vendin tonë", thuhet në komunikatën e AAK-së.
Sipas AAK-së, qeveria nuk i ka përmbushë detyrimet e saj politike përballë partneritetit ndërkombëtar, me asnjë vizitë të nivelit të lartë misioneve të saj, si KFOR-it, selisë së NATO-s, OSBE-së, Zyrës së BE-së etj.
"Departamenti për Politika të Mbrojtjes dhe Sigurisë (DMPS) i AAK-së, vlerëson se, përgjithësisht, qeveria në këto 100 ditë, nuk ka treguar përgjegjësi dhe aftësi politike e kadrovike të menaxhimit dhe ekspertizës për t'iu ofruar qytetarëve të vendit klimën e mirëbesimit, sigurisë dhe mbrojtjes, që atyre iu duhet më së shumti në të gjitha nivelet e saj", përfundon deklarata e AAK-së./KosovaPress/

TAG:
• OSBE