Korrupsioni me varret në Tufinë, gjykata lë në burg drejtorin dhe 3 të tjerë, 3 në 'arrest shtëpie'! Detaji nga dosja, e moshuara dha 50 mijë lekë kursime për 2 varre të zëna

Drejtori i Agjencisë së Shërbimeve Funerale në bashkinë Tiranë, Eliodor Ndini është lënë në burg nga Gjykata e Tiranës, së bashku me 3 punonjës të tjerë të varrezave të Tufinës, pasi u prangosen dy ditë më parë, me akuzen se kanë marrë ryshfet për rezervimin e varreve. Gjithashtu, 3 punonjës të tjerë janë lënë në arrest shtëpie, e një në detyrim paraqitje.

Shitja e varreve në Tufinë ka çuar në pranga 8 persona për skemën korruptive ku sekserët takonin njerëzit që donin të varrosnin dikë apo rezervonin një varr, e ku ishin përfshirë edhe disa zyrtarë të tjerë që punonin në varrezat e Tufinës, si dhe sekserë.

Në dosjen e siguruar nga gazetari i Report Tv Arsen Rusta zbardhet detaji nga për një rast të korrupsonit me varrezat e Tufinës. Bëhet fjalë për një rast abuzimi të kallëzuar nga 81-vjeçarja Mediha Sula, e cila u detyruara të blinte vendin e varrit për vete dhe bashkëshortin e saj, kundrejt shumës prej 500 mijë lekësh të vjetra me kursimet dhe shpërblimin e festave të fundvitit.

Kjo do të realizohej me zhvarrosjen e personave që qenë varrosur aty më herët, e që do të vendosesish në varrezat murale. Pavarësisht kësaj, premtimi nuk u mbajt. Para tre vitesh, në 2019, Mediha Sula është interesuar për dy varre, një për vete dhe një për bashkëshortin e saj. Për këtë, ajo është takuar me një person me emrin Bujar, i cili sipas Sulës ishte shofer te varrezat e Tufinës. Bujari e ka lidhur 81-vjeçarin me një person me emrin Adi, si personin përgjegjës për atë punë. Pasi Mediha Sula ka biseduar me Adin, së bashku me atë, Bujarin dhe bashkëshortin kanë shkuar te varrezat. Adi dhe Bujari e kanë prezantuar çiftin me dy varre, dhe u kanë thënë se ishin me kufoma brenda. Ata i kanë thënë çiftit se do i hiqnin kufomat dhe do rregullojnë varret, në këmbim të shumës 500 mijë lekë të vjetra. 

“Do ta rregullojmë me bordurë sipër, do të shkruaj edhe emrat dhe do e mbarojmë këtë punë, pasi të më japësh 500 mijë lekë të vjetra”, i kanë thënë 81-vjeçares.

Në muajin Dhjetor të 2019 pasi ka marrë shpërblimin e vitit të ri dhe me kursimet që kishte grumbulluar, i ka plotësuar 500 mijë lekët, dhe ia ka dorëzuar Bujarit në makinën e tij. Por pas 6 muajsh Medihaja ka zbuluar se premtimi nuk është mbajtur nga personat të cilët u morën rryshfet.

Të arrestuarit dhe masat e sigurisë:

- Eliodor Ndini (në burg), 32 vjeç, me detyrë Drejtor i Agjencisë së Shërbimeve Funerale të Bashkisë Tiranë, për veprat penale “Korrupsioni pasiv i punonjësve që ushtrojnë funksione publike”, “Ushtrimi i ndikimit i paligjshëm ndaj personave që ushtrojnë funksione publike” dhe “Shpërdorimi i detyrës”;

- Xhemal Mena (detyrim paraqitje), 61 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Shpërdorimi i detyrës”;

- Latif Shehu (ne burg), 63 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Shpërdorimi i detyrës";

- Gazment Daja (ne burg), 49 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Korrupsioni pasiv i personave që ushtrojnë funksione publike";

- Bujar Lica (arrest në shtëpi), 66 vjeç, për veprën penale “Ushtrimi i ndikimit të paligjshëm ndaj personave që ushtrojnë funksione publike”;

- Alban Ajazi (në burg), 28 vjeç, për veprat penale "Ushtrimi i ndikimit të paligjshëm ndaj personave që ushtrojnë funksione publike dhe “Korrupsioni pasiv i punonjësve që ushtrojnë funksione publike";

- Endrin Milla (arrest në shtëpi), 37 vjeç, për "Ushtrimi i ndikimit të paligjshëm ndaj personave që ushtrojnë funksione publike" dhe "Korrupsion aktiv i punonjësve që ushtrojnë funksione publike";

- Fatjon Gjonaj (arrest në shtëpi), 24 vjeç, për veprën penale "Ndërtimi i paligjshëm". 

Gjithashtu, u proceduan penalisht në gjendje të lirë shtetasit Roza Ndoj, 44 vjeçe dhe Julian Çuka, 31 vjeç, për veprën penale 'Shpërdorimi i detyrës'.

Rendit zhvillimet sipas orarit:

Të Fundit Të Parat

K.T./M.Q./Shqiptarja.com

TAG:
• eliodor ndini
• masa sigurie
• Tirane
• varreza
• varrezat tufine