Agim Janina: Ekspozita 'Pranverë 
Art', urë komunikimi me të rinjtë

Ekspozita Pranverë Art është çelur në Muzeun Historik Kombëtar. Kjo ekspozitë i ka fillesat 45 vjet më parë, por në vitin 1972 u censurua për frymën liberale bashkë me Festivalin e 11-të të Këngës.  



E rikthyer vetëm në vitin 2009 me iniciativën e piktorëve më të mirë të traditës, si Lambi Blido, Agim Janina, Maksim Bushi, Lekë Tasi, Anastas Kostandini, e të tjerë ekspozita u bë urë komunikimi mes artistëve të traditës e piktorëve të rinj.



Një nga organizatorët e ekspozitës Agim Janina rrëfen risitë e edicionit të shtatë të Pranverë Art. "Në kushtet e sotme që zhvillohet arti shqiptar me probleme e veta që ka arti figurativ, këta artistë përpiqen të mbajnë gjallë atë që quhet pikturë e kavaletit, por në marrëdhënie me të rinjtë këta artistë e gjejnë veten në harmoni me njëri-tjetrin dhe nuk shikohen se ka ndarje apo kanë kufizime, por janë të hapur, janë si ajo fizarmonika që herë hapet, e herë mbyllet, por këta artistë e gjejnë veten brenda një strukture, atë që ne e quajmë arti” tha piktori Agim Janina



Një tjetër nismëtar i rikthimit të traditës së 'Pranverë Art', skulptori Maksim Bushi pohon se kjo ekspozitë sjell vepra me stile dhe forma më të larmishme. “Vërtetë sot ka shumë këndvështrime të ndryshme, por gjithsecili përpiqet të gjejë edhe natyrën e vet. Deri tani të sukseshëm kanë qenë ata që brenda natyrës së vetë, brenda stilit të tyre kanë ditur ta pasurojnë, kanë ditur ta përfaqësojnë edhe brenda tablove realiste artin e tyre”, tha Maksim Bushi.


 
Ekspozita i dedikohet kryesisht stinës së pranverës, prandaj në tablotë e shumta ajo që të bie në sy janë ngjyrat, por artistët janë përfaqësuar edhe me artin abstrakt apo portretet e personaliteteve të njohura të punuara me shumë dashuri, siç është edhe portreti i Papa Franceskut.




Fotogaleria për foto të tjera



Redaksia online
(Shqiptarja,com)