Ngjarja e shëmtuar në shkollën “Shejnaze Juka” në Shkodër, nga ku militanti i ish-opozitës së vjetër, sulmoi hapur deputeten e opozitës parlamentare Rudina Hajdari, tregoi edhe njëherë se Partia Demokratike, Lulzim Basha dhe celula e tij, nuk janë, dhe nuk do të shkëputen kurrë nga dhuna. Dhuna e tyre qëndron në oborrin e SHQUP-it, dhuna e tyre mban gjallë ndjekësit që kanë mbetur, dhuna e tyre ka sabotuar ribashkimin dhe riorganizimin e asaj partie, dhuna e tyre ka sjellë dhe po sjell dështimet dhe denigrimin e asaj force politike.
Dhuna verbale e sajuar dhe dirigjuar nga SHQUP-i edhe ndaj bijës së Heroit të Demokracisë, duket se ka fashitur gjithçka kishte mbetur për atë njeri, që u vra pabesisht para derës së PD. Lulzim Basha duket se e ka vendosur të vazhdojë represionin ndaj çdo personi, qoftë ky edhe i mandatuar si ligjvënës, thjesht për të mbajtur dhe rritur sigurinë e postit të tij. Lulzimi ka mbetur kryetar i PD-së, pa realizuar asgjë nga zero programi që ka, duke e katandisur atë parti, si objekt eksperimental në duart e militantëve që ende nuk e kuptojnë keqpërdorimin e tyre.
Ngjarja e shëmtuar (e parapërgatitur) që ndodhi në shkollën “Shejnaze Juka”, na tregoi të gjithëve se, PD-ja nuk ka në plan të ribashkohet, të integrohet në grupimin e madh të partive europianiste, por ka mbetur tek koha e Doktorit. Asokohe ndodhnin skena të tilla me fyerje, presione, dhunime dhe metoda të tjera ndaj atyre që kundërshtonin Shefin e Madh në mbledhje kryesie, Kuvende Kombëtare, apo dhe terrene të tjera, nga ku ndërseheshin xhupzinjtë, të cilët të fyenin, grushtonin, dhe nxirrnin jashtë duke ushtruar dhunë verbale dhe fizike.
![](https://shqiptarja.com/template/img/NO_ALFA_Kuadrate shqiptarja.png)
Atë që PD-ja, bëri dje me Rudinën, e ka bërë vite më parë edhe me babain e saj, dhe këto janë fakte që nuk harrohen lehtë. Ish-opozita e vjetër ka vendosur të mbetet si objekt muzeal, i një kohe të shkuar. Duke refuzuar përpjekjet e faktorit ndërkombëtar për zgjidhjen e krizës, Reformën Zgjedhore, uljen në tryezën e bisedimeve me shumicën qeverisës, zhgënjimet e turpshme dhe sigzaket, njëherë “Rama ik” dhe pastaj “Gjiknuri ik”, si dhe pranimi pa kushte i kushteve për bisedime nga OSBE, treguan qartë , se të merresh me ish-opozitën, është thjesht humbje kohe. E krijuar dhe drejtuar nga bajraktarizmi , ish-opozita e vjetër po shtyn muajt dhe vitet, duke prodhuar veçse kaos dhe anarshi politike dhe sociale.
Shqiptarët pas afro 30 vitesh tranzicion, e kanë provuar dhe kuptuar taktikën hileqare të një partie që i ka marrë shumë Shqipërisë, dhe pothuajse nuk i ka dhënë asgjë asaj. Gjithkush që ka ikur dhe po largohet nga ajo parti, padyshim deklaron moskthimin atje derisa në krye të saj të jetë Lulzim Basha dhe sekretarët e tij, derisa atje të vendoset liria dhe demokracia e mendimit dhe veprimit. Të mbështetesh tek dhuna, dhe të kërkosh pushtet, të mbështetesh tek dhuna dhe të kërkosh “hapjen e partisë dhe europianizimin e saj”, të mbështetesh tek dhuna dhe të kërkosh afrimin e të rinjve dhe elitës intelektuale, do të thotë njëlloj, sikur të jesh pjesë e Partisë Komuniste dhe të deklarosh se “kam program të djathtë”.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)