Art, kulturë dhe spektakël, në vijim, rubrika “Ciceron”, ju njeh me aktivitetet që mund të ndiqni sot e nesër në Tiranë dhe disa qytete të vendit.

1. Jo vetëm muzikë cilësore, por edhe show, pas suksesit të koncertit të parë, çifti Venera Lumani dhe Lind Islami, do të mbajnë sot në orën 21.00 tek Amfiteatri pranë Liqenit koncertin “Me zemër”, me këngë që mbajnë autorësinë e tyre.

2. Me një kast të përzgjedhur aktorësh, nga sot deri të dielën, në orën 20.00 në skenën e Teatrit Kombëtar në ArTurbina, premiera "Vojcek", me autor Georg Büchner dhe regjisor Kuniaki Ida.

3. Një llotari e fituar nga “Xhoni dhe Xhoi”, po kush do ta zotëroj?! Historia e Agota Kristof ngjall zemërim, ndërsa ngjarja zhvillohet në një bar surreal. Vazhdimin e ndiqni në teatrin “Metropol” nga sot deri në 16 shtator në orën 19.00, me regji të Endrit Ahmetaj. 

4. “Gjurmët” në telajo të piktorit Adrian Devolli, presin vizitorët deri në 23 shtator në galerinë “Fab” në Tiranë.

5. Vijon e hapur deri në 9 dhjetor në Qendrën Kulturore të Artit Bashkëkohor ‘Harabel’ ekspozita ‘E gjithë drita që nuk mund të shohim’ e piktorit bashkëkohor Ali Oseku.

6. Vihet në skenë këtë mbrëmje në orën 19.00 në teatrin “Andon Zako Çajupi” në Korçë shfaqja ‘Certifikata e martesës’ me autor Ephraim Kishon dhe regji të Driada Dervishit.