TIRANE- Një kontroll blic në muajin dhjetor nga policia dhe strukturat e Drejtorisë së Tatimeve në Tiranë në ambjentet e “Vila Gjuta”, që është në pronë të 35-vjeçarit Vladmir Gjuta, duket se është bërë shkak i hakmarrjes së këtij të fundit ndaj biznesit të familjes së ministrit të Brendshëm Saimir Tahiri.

Burime pranë prokurorisë bëjnë me dije se ekzistojnë dyshime të arsyeshme që vendosja e tritolit në farmaci dhe më pas shumë pranë banesës së Bashkim Tahirit, babait të ministrit, është bërë në shënjë hakmarrjeje, si rezultat i dëmtimit të biznesit. Deri tani kjo është pista e vetme ku janë përqëndruar hetimet, ku nga informacionet operative del se Vladimir Gjura ka pasur disa incidente me policinë në muajin dhjetor.