Kryeministri Edi Rama ka reaguar për herë të parë pas akuzave të opozitës ndaj ish-ministrit të Brendshëm, Saimir Tahiri. Kreu i qeverisë ka postuar një shënim në Facebook, ku shkruan se, "duam të vërtetën sa më parë". Kreu i qeverisë i referohet edhe përgjimeve ambientale të realizuara nga policia italiane për Moisi Habilajn i arrestuar një ditë më parë, duke theksuar se është e neveritshme dhe shokuese ajo që ka dalë nga biseda e dy trafikantëve.

"Duam të vërtetën! Sa më parë! Është e neveritshme dhe shokuese çka ka dalë prej bisedave të dy kriminelëve!? Saimir Tahirin e njoh prej vitesh dhe kam pasur vetëm fjalë mbështetjeje e inkurajimi për të, si person me qëllime të mira, aftësi dhe integritet. Por Shqipëria dhe shqiptarët sot duan e meritojnë të dinë të vërtetën, vetëm të vërtetën dhe asgjë tjetër përveç të vërtetës", shkruan Rama në Facebook. 

Kreu i qeverisë kërkon nga organet ligjzbatuese t'i shkojnë çështjes deri në fund dhe të zbardhin akuzat në adresë të ish-ministrit të Brendshëm. Sipas tij, qeveria e re nuk do mbrojë askënd që zgjedh rrugën e krimit. "Prandaj të gjitha organet ligjzbatuese, duhet t’i shkojnë deri në fund e pa humbur kohë kësaj historie, për të hedhur dritë të plotë mbi faktet. Vetë qeveria e re është krijuar për të mos falur e as toleruar këdoqoftë, që zgjedh rrugën e krimit në vend të rrugës së Shqipërisë që duam - Me shtet, punë, mirëqenie. Asnjë luhatje. Asnjë rezervë. Asnjë dyshim: Lufta jonë me krimin do të vazhdojë në çdo ditë me edhe më shumë forcë. Deri në fund!", shkruan më tej Rama.  

Postimi i plotë i Edi Ramës:
DUAM TË VËRTETËN! SA MË PARË!

Është e neveritshme dhe shokuese çka ka dalë prej bisedave të dy kriminelëve! Saimir Tahirin e njoh prej vitesh dhe kam pasur vetëm fjalë mbështetjeje e inkurajimi për të, si person me qëllime të mira, aftësi dhe integritet. Por Shqipëria dhe shqiptarët sot duan e meritojnë të dinë të vërtetën, vetëm të vërtetën dhe asgjë tjetër përveç të vërtetës. Prandaj të gjitha organet ligjzbatuese, duhet t’i shkojnë deri në fund e pa humbur kohë kësaj historie, për të hedhur dritë të plotë mbi faktet.

Vetë qeveria e re është krijuar për të mos falur e as toleruar këdoqoftë, që zgjedh rrugën e krimit në vend të rrugës së Shqipërisë që duam - Me shtet, punë, mirëqenie.
Asnjë luhatje. Asnjë rezervë. Asnjë dyshim: Lufta jonë me krimin do të vazhdojë në çdo ditë me edhe më shumë forcë. Deri në fund!

postimi i rames
(Reagimi i Ramës në Facebook)

Redaksia Online
l.q/Shqiptarja.com