Akuzat, PS: Basha-Berisha s'kanë
projekt, quajnë partnerët 'mafiozë'

Pas akuzave të Bashës dhe Berishës për ndërkombëtarët, ka reaguar Partisë Socialiste që përmes një deklarate për mediat thekson se kjo çadër nuk ka as plan dhe as shpresë për t’i ofruar Shqipërisë dhe shqiptarëve, përveç thirrjeve dhe kërcënimeve për dhunë.
 
PS shprehet se nuk do ta lejojmë PD-në dhe askënd tjetër që ta kthejë Shqipërinë mbrapa në të kaluarën e kaosit dhe paligjshmërisë.
 
Kryetari i Partisë Demokratike, Lulzim Basha, e cilësoi dje ligjin e Vettingut projekt mafioz, ku sipas tij janë të përfshirë edhe diplomatë të mëdhenj në Tiranë.
 
Deklarata e PS
Berisha dhe Basha nuk kanë asgjë çfarë t’i ofrojnë Shqipërisë, përveç se t’i quajnë “mafiozë” partnerët tanë europianë, të bllokojnë Vettingun dhe të shuajnë çdo fije shprese të shqiptarëve për zhvillim dhe mirëqenie ekonomike.
 
Ata mund të ofrojnë vetëm gënjeshtra nga çadra e tyre, e cila është kthyer tashmë në strehën e fshehjes të së vërtetës nga realiteti.
 
Tashmë po bëhet përherë e më e qartë për të gjithë shqiptarët, se kjo çadër nuk ka as plan dhe as shpresë për t’i ofruar Shqipërisë dhe shqiptarëve, përveç thirrjeve dhe kërcënimeve për dhunë.
 
PS-ja nuk do ta lejojë PD-në dhe askënd tjetër që ta kthejë Shqipërinë mbrapa në të kaluarën e kaosit dhe paligjshmërisë; dhe ne nuk do të lejojmë askënd të bllokojë rrugën tonë drejt Europës dhe drejt shpresës për drejtësi e më tepër vende të reja pune.
 


dy.b/shqiptarja.com