Alarmi i OSBE:Media po humb
misionin,shihet si argëtim

TIRANË – OSBE jep alarmin se media shqiptare po rrezikon gjithnjë e më shumë të humbë misionin e saj. Ambasadori Eugen Wollfarth tha sot gjatë një takimi në një universitet privat se megjithë avancimin e teknologjisë mediat në Shqipëri po varen çdo ditë e më shumë nga burimi i tyre i financimit.
“Ndërsa mediat më parë përfaqësonin zërin e publikut si burimin përfundimtar të fuqisë politike, me nevojën për më shumë para për të mbajtur dhe zhvilluar punën e tyre, ato janë përfshirë gjithmonë e më shumë në botën e biznesit dhe financës. Shpeshherë, ato janë shndërruar vetë në biznese të mëdha, duke pasur në lojë interesat e tyre ekonomike në proceset politike. Është e qartë që kjo vendos kufijtë e lirisë së tyre politike, ndërsa i ndihmon mediat që të mbijetojnë ekonomikisht”, tha kreu i OSBE-së.

Ai argumentoi se mungesa e një raportimi real po shkatërron besimin e publikut te media.
“Nëse kjo tendencë vazhdon, media rrezikon të shndërrohet në një mjet “argëtimi në masë” dhe të humbasë rolin thelbësor në formimin e opinionit publik”, tha ambasadori.

TEKNOLOGJIA DHE SHOQËRIA CIVILE
Sipas ambasadorit Wollfarth, përparimi i teknologjisë, sidomos teknologjisë së medias së transmetuar, i ka vendosur skenës mediatike në Shqipëri të njëjtat kushte financiare.

“Megjithatë, në një mjedis ku media nuk arrin të sigurojë një informacion të tillë “faktik”, por ushqen interpretimet subjektive, ka shumë gjasa që të shfaqet një tablo e shtrembëruar e realitetit. Nuk janë vetëm qytetarët individualë ata që duan të shohin se çfarë po përpiqen të arrijnë politikanët. Është edhe shoqëria civile – një forcë e organizuar që përfaqëson zërat e pjesëve të ndryshme të shoqërisë, e cila mbështetet në raportimin faktik dhe të saktë të medias”, tha Wollfarth.
Më tej kreu i OSBE ka deklaruar se lind nevoja për miratim të një ligji që rregullon praninë e medias në internet. Nga ana tjetër, edhe kushtet e punësimit të gazetarëve kërkojnë vëmendje shumë më të madhe.

.

TAG:
• OSBE