Albin Kurti: Na duhet dikush që t'i fusë në burg 'Al Capone'-t e Kosovës dhe fajdexhinjtë

Lideri i Lëvizjes Vetëvendosje, Albin Kurti është shprehur se koalicioni qeveritar e ka thyer ‘sundimin e ligjit’ duke mbajtur sundimin për vete dhe ligjin për popullin. Ai thekson se për të vendosur drejtësinë duhet të fusim në burg 'Al Capone-t'.

"Ky regjim i PANhajnisë e ka thyer në mes ‘sundimin e ligjit’: sundimin për vete, ligjin për popullin. Nga veprat penale të trajtuara nëpër Gjykatat e Kosovës, vetëm 1% janë raste të korrupsionit dhe asnjë prej tyre nuk është rast i profilit të lartë. Vendi ynë po bëhet i pajetueshëm kurse shteti ynë i paqëndrueshëm.

Për drejtësi duhet një Eliot Ness yni që i fut në burg Al Capone-t kosovarë. Për zhvillim duhet qeverisje e re që sjell investime dhe punësim me ndërmarrje që rriten. Për demokraci duhet të largohet klika e tajkunëve dhe fajdexhinjve nga udhëheqja e shtetit dhe PDK-së.

Ish të burgosurit politikë dhe ish luftëtarët çlirimtarë bëjnë mirë ta shpëtojnë vetveten nga (ish) shokët e tyre në PANik. Mandej bashkë edhe Kosovën e shpëtojmë më shpejt e më kollaj" shkruan ai.

TAG:
• Albin Kurti
• Lëvizja Vetëvendosje