Albin Kurti zbulon se u takua me Edi Ramën në Bruksel: Takim miqësor pa protokoll

Kryeministri i Kosovës, Albin Kurti ka zbuluar se ka zhvilluar një takim miqësor në Bruksel, me kryeministrin Edi Rama. Kurti thekson se takimi me Ramës ishte pa protokoll dhe u fol për nevojën dhe format e bashkëpunimit  mes dy shteteve. Kurti tha se u takua edhe me liderët e Ballkanit Perëndimor dhe Përfaqësuesin e Lartë të Bashkimit Evropian për Politikë të Jashtme dhe Çështje të Sigurisë, Josep Borrell  duke i cilësuar si një mundësi të mirë për të përfaqësuar qeverinë e tij në arenën ndërkombëtare.

 "Gjatë vizitës në Bruksel për darkën tradicionale me liderët e shteteve të Ballkanit Perëndimor, pata takime me Përfaqësuesin e Lartë të Bashkimit Evropian për Politikë të Jashtme dhe Çështje të Sigurisë, z. Josep Borrell, që ishte edhe nikoqir i darkës, Përfaqësuesin Special të Bashkimit Evropian për Dialogun Kosovë-Serbi dhe çështjet e tjera rajonale të Ballkanit Perëndimor, z. Miroslav Lajčák, dhe Raportuesen për Kosovë në Parlamentin Evropian, znj. Viola Von Cramon. Kurse me kryeministrin e Shqipërisë, Edi Rama, u takuam miqësisht e pa protokoll, para darkës, e për të diskutuar mbi nevojën dhe format e bashkëpunimit e bashkëveprimit në mes dy shteteve tona. Kjo vizitë ishte një mundësi e mirë për të përfaqësuar Kosovën dhe qeverinë e re të saj reformiste të dalur nga fitorja plebishitare e 14 shkurtit, për të diskutuar rëndësinë që kanë për njëri-tjetrin Bashkimi Evropian dhe Ballkani Perëndimor, si dhe mundësitë për të rritë ndihmën, mbështetjen dhe bashkëpunimin gjatë pandemisë dhe përtej e pas saj", shkruan Kurti në facebook.

TAG:
• edi rama
• Bruksel
• Albin Kurti
• integrimi ne be