AMA s'do të lejojë transmetimin e
filmave pa të drejta,gjoba shkelësve

TIRANE-Autoriteti i Mediave Audiovizive nuk do të lejojë transmetimin e filmave pa kontratë, ose marrëveshje, ndërsa do të ketë dhe ndëshkime me gjobë nga 1.000.000 deri në 2.000.000 lekë.
 
AMA njofton se ka ndjekur dhe ndjek me vëmendje respektimin e të drejtave për transmetimin e filmave, shqiptarë edhe të huaj nga ana e subjekteve televizivë.
 
Prej muajit tetor 2016 e në vijim AMA ka kryer monitorime sistematike, ka bërë vërejtje dhe tërheqje vëmendjeje, si dhe ka marrë masa administrative duke sanksionuar me gjobë televizionet që kanë transmetuar filma pa kontrata, ose marrëveshje.
 
Pavarësisht kësaj, AMA pohon se ende konstatohet se ka probleme me mosrespektimin e kuadrit legjislativ dhe transmetime filmash pa kontrata, ose marrëveshje.
 
Institucioni mbikëqyrës i mediave audiovizive kërkon nga subjektet që të merren masa të menjëhershme, që gjatë aktivitetit audioviziv të mos transmetohet asnjë film, televiziv, kinematografik, shqiptar, apo të huaj, pa nënshkruar më parë një kontratë, ose marrëveshje me mbajtësit realë të të drejtave të tyre.
 
Hapësira ligjore që e ndalon dhe gjoba
 
Duke e parë si një detyrim ligjor nga të gjithë aktorët që operojnë në tregun audioviziv, Autoriteti sjell në vëmendje se në bazë të ligjit nr. 97/2013 datë 4.3.2013 “Për mediat audiovizive në Republikën e Shqipërisë”, i ndryshuar, të gjitha televizionet duhet të transmetojnë filma vetëm në përputhje me kushtet dhe afatet për të cilat kanë nënshkruar kontrata, ose marrëveshje të shoqëruar me listën konkrete të filmave.
 
Transmetimi i filmave pa kontratë, ose marrëveshje, përbën kundërvajtje administrative dhe ndëshkohet me gjobë nga 1.000.000 deri në 2.000.000 lekë. Përsëritja e shkeljes më shumë se 3 herë dënohet me uljen deri në 50 për qind të afatit të licencës dhe/ose autorizimit dhe, në rast ripërsëritjeje, shkelja ndëshkohet me heqjen e licencës dhe/ose autorizimit.
 
Gjithashtu AMA i bën thirrje subjekteve të jenë më të kujdesshëm në lidhje me nënshkrimin e çdo marrëveshje, apo kontrate për të drejtat e filmave, si dhe të sigurohen mirë që subjekti me të cilin nënshkruajnë këto marrëveshje, apo kontrata, i zotëron vërtet të drejtat që kalohen dhe zotërimin e certifikatave të të drejtave, të shoqëruar me titujt e të filmave, të lëshuara nga prodhuesi i tyre.
 
Redaksia Online
B.B/Shqiptarja.com