Ambasadori Arvizu në presidencë
takon Bujar Nishanin

TIRANE -  Ambasadori amerikan, vetëm një ditë pas vajtjes së kryeministrit ka mbërritur me urgjencë në Presidencë. Kështu pas takimeve të djeshme që ka patur me liderin e PD Sali Berisha dhe fill pas tij me kryebashkiakun Basha, Presidenti i vendit Bujar Nishani ka takuar ambasadorin e Shteteve të Bashkuara të Amerikës, Aleksandër Arvizu.  Në orën 13:15 makina e ambasadorit të SHBA-së Aleksandër Arvizu është parë në oborrin e presidencë. 
Takimi mes presidentit dhe ambasadorit Arvizu zgjati rreth 30 minuta.

Nuk ka pasur asnjë deklarim zyrtar se çfarë është biseduar mes tyre. Por ajo që ka rënë në sy ka qënë fakti se deri në orët e vona të mbrëmjes në sitin zyrtar të Presidentit nuk është shënuar asnjë njoftim për një takim të tillë, pavarësisht se dje kreu i shtetit ka pasur takim lamtumire dhe me ambasadorin e OSBE në Tiranë Eugen Wollfarth, të cilin e kishin hedhur në faqen zyrtare.

Burime të brendshme nga Presidenca të konfirmuara dhe nga brenda ambasadës amerikane saktësojnë se zgjedhjet parlamentare që sapo përfunduan kanë qënë objekti i bisedës mes tyre.

Dy bashkëbiseduesit Nishani e Arvizu kanë diskutuar mes tyre modalitetet e rotacionit politik dhe kalimin paqësor të pushtetit nga mazhoranca e djathtë e kryesuar nga Berisha tek aleanca e majtë e kryesuar nga Edi Rama. Mësohet se është diskutuar dhe në lidhje me mundësinë e evitimit të vakuumit të pushtetit, që është rrezik për çdo prag rotacioni për të qëndruar në detyrë qeveria deri në momentin e betimit dhe miratimit të qeverisë së re të kryesuar nga Rama, gjë e cila u vertetua dhe nga deklarata e dorëheqjes së kryeministrit Berisha dhe betimi i tij se do të qëndrojë në krye të qeverisë deri në shtator kur të vijë qeveria e re.

Ndërkohë që mësohet se është biseduar dhe në lidhje me situatën në të cilën gjendet vendi tashmë që ndërrimi i pushtetit është fakt i kryer sidomos në drejtim të goditjes së krimit e mbrojtjes së jetës së qytetarëve, pasi Presidenti si simbol i unitetit të Kombit ka një rol parësor. Tashmë është bërë e udhës që të gjithë ambasadorët e rëndësishëm të vendeve perëndimore në Shqipëri, por sidomos ata të SHBA të jenë shumë aktivë në momentet kyçe për vendin.

Takimi u zhvillua kur procesi i numërimit ishte drejt përfundimit dhe nga projeksionet paraprake koalicioni i majtë dilte me 84 mandate ndërsa koalicioni i djathtë 56 mandate. Mbrëmjen e djeshme  kreu i PS-së Rama mbajti fjalimin e fitores para simpatizantëve të PS-së, ndërkohë që mbrëmjen e sotme kryeministri doli në një deklaratë për të pranuar rezulatin e zgjedhjeve të 23 qershorit dhe për të deklaruar dorëheqjen nga të gjitha funksionet e PD-së. 


Lajmi u perditesua
Redaksia online
(sg/shqiptarja.com)

TAG:
• OSBE