/ ATSH / - Ndotja detare tashmë është kthyer në një  shqetësim global.

Qese plastike, shishe, lodra,  kova, derdhje industriale nga anijet dhe industritë e shumë gjëra të tjera të bëra nga plastika dhe materialet e ngjashme notojnë në oqeanet botërore dhe po e kërcënojnë jetën ujore, kanë deklaruar shkencëtarët  dhe ambientalistët ditë më parë, duke theksuar se në sipërfaqen e deteve përreth botës notojnë  rreth 300 tonelata mbeturina plastike.

Shkencëtarët në gjashtë vitet e fundit kanë ndërmarrë  24 ekspedita detare në të cilat  eksploruan të gjitha oqeanet e botës, ndërsa rezultatet u botuan në revistën PLOSONE. "Ekzistojnë shumë më shumë mbeturina plastike sesa mendohej bazuar në vlerësimet e fundit," shprehet Marcus Eriksen, një nga drejtorët e institutit nga Los Angelosi,  i cili merret me problemin e ndotjes së oqeanit.

"Sipërfaqja e oqeanit ka gjithçka që mund ta imagjinoni. Është si një supermarket i madh", tha Eriksen, i cili  udhëhoqi hulumtimin. Eriksen tha se 92 për qind e plastikës në det është në formën e "mikroplastikës", copa të vogla plastike që janë krijuar me shpërbërjen afatgjatë të copave më të mëdha plastike.

Ekspertët në vitet e fundit kanë paralajmëruar vazhdimisht se mbeturinat plastike  rrezikojnë shumë specie kafshësh, duke përfshirë zogjtë dhe gjitarët e detit, si dhe të gjitha krijesat e tjera që varen nga ekuilibri i ekosistemeve oqeanike. Mbeturinat plastike hyjnë në oqeane nga lumenjtë dhe zonat shumë të ndotura bregdetare, si edhe nga anijet të cilat lundrojnë rrugëve oqeanike