TIRANË- Agim Krasniqi, analisti nga Kosova e ka cilësuar si një performancë të jashtëzakonshme fjalimin e kryeministri Edi Rama në KiE. Në një intervistë për Report Tv me gazetarin Nertil Agalliu, Krasniqi tha se Rama ia vuri në dukje gabimet që ka bërë ky institucion ndërkombëtar me shqiptarët.

“Ka bërë një performancë të shkëlqyeshme se për herë të parë i është drejtuar KiE për gabimet që ka bërë ndaj shqiptarëve. Se përmes një raporti të rremë, që ta devlerësojnë luftën çlirimtare që është mbështetur nga shtet perëndimore prej të cilëve sot e kemi shtetin e Kosovës dhe iu tha se keni diskriminuar shqiptarët dhe veprimet që kanë qenë mbështetur nga ata, tani dua t’i japin një ngjyrë tjetër”, tha Krasniqi.

Ai u ndal edhe në mundësitë e një vizite të mundshme të kryeministrit Albin Kurti në Hagë, për të takuar ish-drejtuesit e UÇK, njëjtë si ka bërë edhe Rama, duke thënë gjasat janë, për shkak se ‘Vetëvendosje’ ka qenë kundër ngritjes së Gjykatës Speciale.

“Kurti është në vijë kombëtare me aktor të tjerë, shpresoj që një ditë të shkojë në Hagë se VV e ka kundërshtuar gjykatën speciale dhe në këtë pikë nuk ka dallime”, tha Krasniqi.

Nga Strasburgu, kryeministri Edi Rama e ka quajtur ‘fake neës’ raportin e Dick Martyt për krimet e pretenduara se janë kryer nga drejtuesit e UCK-së gjatë luftës në Kosovë. Rama tha se ky raport ishte një dështim i turpshëm i diplomacisë ndërkombëtare, që duhet zhbërë pa humbur kohë.