Anija ruse hyn në ujërat britanike, sekretari Mbrojtjes paralajmëron Putin: Ne ju shohim dhe e dimë se çfarë po bëni

Britani e Madhe- Marina Mbretërore ka monitoruar një anije spiune ruse pasi ajo hyri në ujërat britanike në fillim të kësaj jave, ka deklaruar sekretari britanik i Mbrojtjes, John Healey, para deputetëve sot (22 janar).

Healey ka thënë se anija, Yantar, është përdorur për marrjen e informatave inteligjente dhe hartës së infrastrukturës kritike nënujore të Mbretërisë së Bashkuar.

Ai ka shtuar se incidenti është “një shembull tjetër i agresionit rus në rritje”.

“Unë gjithashtu do të doja që presidenti Putin të dëgjonte këtë mesazh: ne ju shohim, ne e dimë se çfarë po bëni dhe ne nuk do t’i shmangemi veprimeve të forta për të mbrojtur këtë vend”, është shprehur Healey.

Rusia e përshkruan Yantar si një anije kërkimore oqeanike dhe operohet nga Ministria e Mbrojtjes e vendit.

Vendet perëndimore e kanë gjurmuar shpesh anijen që operon në ujërat evropiane dhe ata dyshojnë se një pjesë e misionit të saj ka qenë gjetja e kabllove nënujore, citon BBC.

Ata gjithashtu besojnë se Rusia e ka rritur këtë aktivitet që kur ka nisur pushtimin e saj në shkallë të plotë të Ukrainës.

Healey tha se Yantar ishte aktualisht në Detin e Veriut, pasi kaloi nëpër ujërat e Mbretërisë së Bashkuar dhe u zbulua 45 milje larg bregut britanik në Kanalin Anglez të hënën.

"Për dy ditët e fundit Marina Mbretërore ka vendosur HMS Somerset dhe HMS Tyne për të monitoruar anijen çdo minutë nëpër ujërat tona," tha ai.

"Kam ndryshuar rregullat e angazhimit të Marinës Mbretërore në mënyrë që anijet tona luftarake të mund të afrohen dhe të gjurmojnë më mirë Yantarin. Deri më tani, anija është në përputhje me rregullat ndërkombëtare të lundrimit."

Sekretari i mbrojtjes tha gjithashtu se kjo ishte hera e dytë që anija kishte hyrë në ujërat britanike gjatë muajve të fundit.

Xh.K/Shqiptarja.com

TAG:
• John Healey
• angli
• Rusi
• vladimir putin