Durres- Prokuroria e Durrësit ka nisur tashmë hetmet mbi transportimin e ngarkesës me 816 ton që dyshohet të jetë me mbetje të rrezikshme pluhur nga filtrat e furrave të çelikut të kompanisë KURUM, të nisur më 4 korrik 2024 nga Porti i Durrësit drejt Tajlandës.
Ekskluzivisht për Report TV, Ministria e Mjedisit konfirmoi dje se ngarkesa kishte dalë nga zona e ish-Metalurgjikut të Elbasanit, ku Kompania ndërkombëtare KURUM ushtron aktivitetin.
Përmes një njoftimi për median prokuroria e Durrësit konfirmoi sot se ka regjistruar procedimin penal nr.1596, datë 16 gusht 2024” për tre vepra penale “kontrabandë me mallra të ndaluara, ose të kufizuara”, “Transportimi i mbetjeve”dhe “Shpërdorimi i detyrës”. Ndërkohë Report Tv mëson ekskluzivisht nga burime të sigurta se mbetjet janë deklaruar në doganë si 'Oksid hekuri', pra si mbetje që nuk ishin të rrezikshme.
![](https://shqiptarja.com/template/img/NO_ALFA_Kuadrate shqiptarja.png)
'Prokuroria e Durrësit nis hetimet për Veprën Penale “Kontrabandë me mallra të ndaluara ose të kufizuara” mbi ngarkesën e nisur nga Porti i Durrësit
Prokuroria pranë Gjykatës së Shkallës së Parë të Juridiksionit të Përgjithshëm Durrës ka regjistruar procedimin penal nr.1596, datë 16.08.2024, mbi bazën e materialeve të referuara nga Drejtoria e Përgjithshme e Doganave për veprën penale “Kontrabandë me mallra të ndaluara ose të kufizuara”, parashikuar nga neni 171 i K.Penal në lidhje me një ngarkesë të nisur nga Porti i Durrësit.
Gjithashtu në këtë institucion, është referuar materiali hetimor nga Drejtoria Vendore e Policisë Durrës, për veprën penale “Transportimi i mbetjeve”, parashikuar nga neni 201/b i Kodit Penal dhe “Shpërdorimi i detyrës”, parashikuar nga neni 248 i Kodit Penal, ku referohen informacione të marra nga media në lidhje me këtë ngarkesë për të cilën dyshohet se ka mbetje toksike.
Ne dogane u regjistruan si "Oksid Hekuri'
Fillimisht ka qenë Policia e Durrësit që ka kryer procedurat paraprake të verifikimit dhe procedimit penal, duke ia kaluar më tej dosjen Prokurorisë së Rrethit, ndërsa për transportin e mbetjeve si nënkontraktor është kompania “Sokolaj” shpk e cila është duke u hetuar sipas Nenit 202 të Kodit Penal, ‘transportimi I mbetjeve toksike’. Ndërkohë në doganë janë regjistruar si 'Oksid Hekuri"
Dogana ka deklaruar se nuk ka pasur dijeni për ngarkesën. Ndërkohë Prokuroria po kontrollon dokumentet doganore përkatëse nëse procedurat janë kryer siç duhet apo dhe nëse ka mangësi në to.
Prokuroria shqiptare në bashkëpunim me institucionin e Bashkimit Evropian OLAF po hetojnë një ngarkesë që dyshohet të jetë 816 ton mbetje të rrezikshme pluhur nga filtrat e furrave të çelikut.
Çfare deklaroi dje ministria e Mjedisit?
Ekskluzivisht për Report TV, Ministria e Mjedisit konfirmon se: ‘Vëllimet e mallrave të cilat dyshohen se përmbajnë mbetje të dala nga procesi teknologjik i realizuar nga kompani ndërkombëtare që operojnë pranë kompleksit metalurgjik në Elbasan, janë ngarkuar në njësi kontejnerike pranë Terminalit të Mallrave Rifuxhio në Durrës, i cili operohet nga kompania koncesionare gjermane EMS’.
Kompania ndërkombëtare që ushtron aktivitetin në ish-metalurgjikun e Elbasanit është KURUM.
Anijet “Compton” dhe “Candor” do mbërrinin në Tajlandë mes 18 dhe 22 Gushtit, por sinjalizimi nga organizata “Basel Netëork Action” sensibilizoi grupimet ekologjike dhe autoritetet, duke e kthyer mbrapsht ngarkesën me 100 kontejnerë. Madje njëra nga anijet, “Compton”, fiku edhe sinjalin e GPS më 31 korrik, 1 ditë para se të afrohej në Cape Town në Afrikën e Jugut.
Më pas kompania ndërkombëtare Maersk tha sinjali i vendndodhjes u ndez. Zyrtarët tajlandezë cituar nga mediat deklaruan se nuk do t’i pranojnë anijet në territorin e tyre. Sipas Konventës së Bazelit, Traktati i Kombeve të Bashkuara që rregullon tregtinë e mbetjeve të rrezikshme dhe të tjera, kontejnerët do të riatdhesohen në Shqipëri.
Lajm në përditësim...
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)