Gjykata Kushtetuese ka mbyllur punimet e mbledhjes së sotme pa një vendim për çështjen e zv/kryeministres Belinda Ballukut. Kjo është mbledhja e dytë e Kushtetueses që në rend dite përfshin shpalljen e vendimit për pezullimin e ligjshëm ose jo nga detyra të Belinda Ballukut nga GJKKO, por që mbyllet pa asnjë vendim.

Sipas burimeve për gazetaren e Report Tv Esiona Konomi, gjyqtarët kushtetues kanë vlerësuar se koha e mbetur pas trajtimit të dy çështje të para në rendin e ditës, nuk u mjaftonte për të dalë me një vendim për pikën e 3-të, pra rastin e Ballukut. Të njëjtat burime bëjnë me dije se gjyqtarët kanë rënë dakord se kur ta hapin këtë çështje, do të duhet të dalin me vendim brenda ditës, e sot nuk ju mjaftonte koha. Marrja e vendimit shtyhet me afat të pacaktuar.

Një javë më parë, gjyqtarët kërkuan më shumë kohë për shqyrtim. Shumica socialiste po ashtu ka kushtëzuar shqyrtimin e kërkesës së SPAK për arrestimin e Ballukut, me vendimin e Gjykatës Kushtetuese.

GJKKO, me kërkesë të SPAK pezulloi nga detyra zv/kryeministren Balluku e pandehur për abuzime me tenderin e Llogarasë, por Kryeministri Rama e cilësoi këtë si një shkelje të kompetencave të tij.

Rama e çoi në Gjykatën Kushtetuese çështjen Balluku, me argumentin se GJKKO ka shkelur kufirin e një tjetër pushteti, atij ekzekutiv duke marrë kompetencat e tij si kryeministër për pezullimin ose shkarkimin e një anëtari qeverie.

Pas kërkesës së kryeministrit Rama, gjykata riktheu përkohësisht në detyrë Ballukun deri sa çështja e saj të shqyrtohej në themel nga “Kushtetuesja”.

E pandehur për shkeljet në tenderin 190 mln euro të Tunelit të Llogarasë dhe nën hetim për 7 procedura të tjera prokurorimi lidhur me ndërtimin e lotëve të Unazës së Madhe, SPAK ka dyshime se Balluku duke qenë në detyrë, rrezikon të prishë provat hetimore dhe të intimidojë dëshmitarët.