Apeli i OSBE-së para seancës:
Votoni sot 3 pr/ligjet e progresit

TIRANE – Pak para fillimit të seancës plenare në Kuvend, e cila ka në rend të ditës tre projektligjet që kërkojnë edhe votën e opozitës dhe njëkohësisht janë kushte nga Bashkimi Evropian për marrjen e statusit kandidat, prezenca e OSBE-së në Shqipëri, Eugen Wollfarth përsëriti sot apelin ndaj palëve politike për t’i votuar këto ligje.

Wollfarth shprehu besim se sot në Kuvend do të merret vendimi i duhur, ndërkohë që theksoi se kjo çështje tashmë është e nivelit ndërkombëtar.

“Kur është në lojë një çështje kombëtare, vendimi duhet të merret me sytë drejtuar nga konteksti ndërkombëtar dhe sot është dita e atij vendimi”, u shpreh prezenca e OSBE-së gjatë një takimi me përfaqësues të komunitetit rom, pranë shkollës “Bajram Curri” në kryeqytet.

Sipas Wollfarth, populli shqiptar e meriton progresin dhe për të arritur zhvillimin, pjesë e rëndësishme sipas tij, janë ligjet dhe një funskionimi i sistemit të drejtësisë.

“Viti i ardhshëm është vit zgjedhjesh; më pas, me sa duket, do të duhet më shumë kohë për të bërë përpara në rrugën e integrimit evropian. Kjo mund të thotë, gjithashtu, që koha që po kalon nuk investohet siç duhet në procesin e reformave. Unë jam ndërkombëtar, por, nga këndvështrimi im, populli shqiptar e meriton progresin. Ai meriton, po ashtu, kornizën brenda së cilës ndodh ky progres. Një pjesë skajshmërisht e rëndësishme në këtë kornizë janë ligjet dhe shteti i së drejtës. Shqipëria do të ketë një të ardhme pavarësisht asaj që ndodh sot, por kjo e ardhme do të jetë më e shpejtë dhe më e mirë, nëse vendimet e duhura merren sot.”, vijoi prezenca e OSBE-së në Tiranë, Eugen Wollfarth.

Kuvendi mblidhet sot në seancë plenare për të votuar tre projektilgjet që kërkojnë 3/5 në Parlament, pra edhe votimin nga opozita. Por deri dje kreu i Partisë Socialiste, Edi Rama është shprehur se nuk do të votojë pa u zgjidhur më parë çështja e Këshillit të qarkut të Fierit.

Redaksia Online
Gre.M/Shqiptarja.com

TAG:
• OSBE