Apelimi i Finos për zgjedhjet në FSHF, Duka: Nuk e njohim CAS-in shqiptar

Vijon beteja Duka-Fino. Edhe pse i humbi zgjedhjet në shkurt për postin e kreut të FSHF, Fino nuk është dorëzuar duke e apelur çështjen. Pas humbjes së zgjedhjeve, Fino e apeloi vendimin për pjesëmarrjen në votim të 12 shoqatave ,që i cilësoi si fantazmë.

Kandidati Fino e dërgoi çështjen në CAS-in shqiptar dhe të atë të Lozanës. E ndërsa nga CAS-i i Lozanës (Gjykata Ndërkombëtare e Arbitrazhit Sportiv) ende nuk ka zhvillime, Duka shprehet se nuk e njeh CAS-in shqiptar.

Presidenti i FSHF, i është përgjigjur një letre të mbërritur në datën 16 prill 2018, që siç thotë Duka, është nga dikush që prezantohet si Këshilli i Arbitrazhit Sportiv.

Ironia e fatit qëndron në faktin që Duka u akuzua se 12 shoqatat rajonale nuk ishin regjistruar në mënyrë që të cilësoheshin të ligjshme dhe të votonin në zgjedhje, ndërsa në letrën e drejtuar CAS-it shqiptar i kërkon të dhënat juridike, vendim gjyqësor, pasi në të kundërt nuk e njeh.

Pergjigje nje letre te marre ne daten 16.04.2018 nga dikush që prezantohet si Këshilli i Arbitrazhit Sportiv.

Kujtdo që na është drejtuar si KAS,

I/E nderuar zonjë/zotëri që prezantohesh si Sekretar i një organizatë që sipas jush quhet KAS,

Kemi marrë në adresën tonë letrën e quajtur Njoftim të datës 10.04.2018, ku na bëni të ditur se për rrethana apo kondita që janë të panjohura prej nesh ju na bëni të ditur se mesa duket e konsideroni vetën përfaqësues të një organizate që qenka e legjitimuar të zhvillojë një lloj procedure gjykimi në lidhje me disa cështje që lidhen me organizatën tonë. Nëse ka qenë një gabim njerëzor ju lutem na thoni.

Po ashtu na bëni të ditur se këtë nismën po e coni përpara në sajë të kërkesës së një prej anëtarëve të Kuvendit të Shqipërisë, të nderuarit z. Bashkim Fino, kërkesë për arbitrazh kjo që na keni përcjellë gjithashtu. Në asnjë moment nuk duket të dyshoni në kompetencat tuaja për të vlerësuar këtë cështje dhe na ftoni të zbatojmë një farë rregullore tuajën, e madje na keni caktuar, Ju i paidentifikuar sekretar, edhe disa afate të cilat duhet t’i zbatojmë, duke na kërkuar të caktojmë edhe një arbitër nga një listë që keni përcjellë ju vetë, ku nuk njohim dhe as mund t’i besojmë asnjë individi.

Në këto kondita duhet t’ju lajmërojmë se në radhë të parë FSHF nuk ka asnjë marrëveshje arbitrazhi me të nderuarin anëtar të Parlamentit, z. Bashkim Fino, dhe nuk e kuptojmë dot si mund të jemi ftuar në arbitrazh prej tij pa e patur këtë marrëveshje.

Ndërkohë ju lutem të identifikoni organizatën tuaj me të gjitha të dhënat juridike të nevojshme të saj, vendim gjyqësor apo NUIS, statut e të tjera akte të nevojshme për identifikimin e një personi juridik. Më pas ju lutem identifikohuni ju i nderuar Sekretar dhe na sqaroni pak edhe se cfarë është kjo rregullorja dhe cfarë ekspertize kanë këta zotërinjtë që na keni imponuar si arbitra, kush i zgjedh ata, pse smund të zgjedhim një tjetër.

Por ndërkohë, nëse ju jeni pjesë e asaj organizatës që nuk lindi kurrë e që ja ka ndërruar disa herë vetes emrin në KOSH, KOKSH, KOKSHI etj, një organizatë parapolitike e krijuar nga Qeveritë e Republikës së Shqipërisë, ju lutem të ndërprisni cdo veprim të mëtejshëm në lidhje me këtë cështje. Federata Shqiptare e Futbollit dhe organizatat ndërkombëtare ku ajo aderon nuk kanë njohur dhe deri më sot nuk njohin mundësinë për t’i shtruar cështjet tona ligjore para atij që për herë të fundit në vitin 2010 kërkohej të na impnohej nga Ministri i Sportit si Arbtrazh Sportiv ndërkonfederativ. Është për këtë shkak që në statutin (neni 10) tonë deri sa një institucion i tillë të pranohet sipas standardeve të UEFA dhe FIFA, cështje i referohen CAS/TAS Laussane. Deri më sot nuk kemi marrë nga organizatat ku aderojmë një opinion të kundërt në lidhje me këtë cështje.

I nderuar i panjohur, sa po ju të vendosni të identifikoheni, ne ndoshta do ta vijojmë komunikimin tonë duke qenë pak më të informuar. Po ashtu do shikojmë edhe mundësinë e hapave ligjore ndaj atyre që na shqetësojnë pa shkak dhe pa tagër në veprimtarinë tonë shumë domethënse për përparimin e sportit me të dashur në planet.

Në pritje të identetit tuaj,

Armand DUKA

TAG:
• Armand Duka
• bashkim fino
• zgjedhjet ne fshf
• CAS