Arben Isaraj, zëvendësministri i
PS thumbon Metën: KED doli kopil

Teksa Ylli Manjani thumbon kryeministrin, ish-zëvendësi i tij, akoma në detyrë si numri dy i Drejtësisë, socialisti Arben Isaraj ja kthen borxhin Metës. Duke i kujtuar rolin e tij si drejtues i procesit të ngritjes së Këshillit të Emërimeve në Drejtësi në detyrën e Kryetarit të Kuvendit, Isaraj thotë se produkti doli “kopil”. “Je kokë a je pil ? Kur në pikën 3, të nenit të freskët 149/d56, të gjithëpranuar dhe të gjithëvotuar të Kushtetutës së Republikës së Shqipërisë thuhet : “3.

Këshilli i Emërimeve në Drejtësi përbëhet nga 9 anëtarë të përzgjedhur me SHORT, nga radhët e gjyqtarëve dhe prokurorëve, ndaj të cilëve nuk është dhënë masë disiplinore.

Ata ushtrojnë detyrën me mandat njëvjeçar, që fillon në datën një janar të çdo viti kalendarik. Presidenti i Republikës përzgjedh me short, midis datave 1 dhe 5 dhjetor të çdo viti kalendarik, dy gjyqtarë nga Gjykata Kushtetuese, një gjyqtar nga Gjykata e Lartë, një prokuror nga Prokuroria e Përgjithshme, dy gjyqtarë dhe dy prokurorë nga gjykatat e apelit, si dhe një gjyqtar nga gjykatat administrative.

Nëse Presidenti i Republikës nuk arrin të zgjedhë anëtarët deri në datën 5 dhjetor, Kryetari i Kuvendit i zgjedh ata me SHORT brenda datës 10 dhjetor të atij viti kalendarik. Avokati i Popullit merr pjesë si vëzhgues në procedurën e hedhjes së SHORTIT si dhe në mbledhjet dhe veprimtarinë e Këshillit të Emërimeve në Drejtësi.””,-citon zëvendësministri i drejtësisë aktin themeltar të shtetit, Kushtetutën.

Për të thelluar ironinë ai thërret në ndihmë fjalorin e gjuhës shqipe. “Kur në fjalorin e Gjuhës Shqipe, fjala “SHORT” nënkupton: Një proces a mënyrë “për të caktuar a për të zgjedhur dikë, për të ndarë diçka me paanësi ndër dy a më shumë veta ose për të zgjidhur një çështje duke hedhur zare a një monedhë metalike (kokë a pil), duke tërhequr nga një letër, duke fshehur diçka në grusht etj".

Na ndodh çudia e “keqkuptimit” të kuptimit të fjalës “SHORT”, si mënyra apo rruga e vetme kushtetuese e përzgjedhjes së anëtarëve të Këshillit të Emërimeve në Drejtësi”,-thotë Isaraj. Zëvendëskryeministri kujdeset që të bëjë diferencën e interpretimit mes Lu-së dhe Metës.

“Amerikani, që për tu marrë vesh me ne e ka mësuar mirë shqipen, thotë se sipas kushtetutës në “short” na duhet edhe koka edhe pili. Shqiptari, ndryshe nga aleati i tij më i madh historik, thotë se sipas ligjit në “short” nuk na duhet edhe koka edhe pili. E për të mos ta zgjatur dhe për ti rënë shkurt, shqiptari na thotë se më mjafton koka pa pilin apo dhe pili pa kokën. E thënë shqip dhe shkurt “short”-i kushtetues e do dhe kokën dhe pili-n. “Short”-i kushtetues pa kokë dhe pa pil nuk është gjë tjetër veçse kopil”-thotë në përfundim Arben Isaraj, zëvendësministër i drejtësisë.

Redaksia Online
Al.N/Shqiptarja.com